In die Finsbury krieketligawedstryd op 19 Februarie het die 1e-span van Hoërskool Merensky hul opponente van Hoërskool Ben Vorster op hul tuisveld ontmoet. In hierdie opwindende wedstryd het die Plasies eerste gekolf en 145/10 as teiken gestel. Hoërskool Ben Vorster het die uitdaging geantwoord met 96/10, wat meegebring het dat Hoërskool Merensky se manne seëvierend van die veld gestap het met 49 lopies in die sak.

Krieket 1e vs BV (1)
Voor: Timothy Baker. Middel: Ockert Schoeman, Johan van den Heever, Christo van Niekerk, Alfred Nel.
Agter: Christiaan de Beer, Maan Mistry, Hendrik Botes, Don Hunter, Henro Delport, Marais Botha, Calvin Severin, Willem Schutte, mnr. Stebian van der Walt (afrigter).

Daar was verskeie uitblinkers met die kolf: Calvin Severin behaal 34 lopies, Marais Botha 23 en Hendrik Botes 19 lopies. Botes het hom ook met die bal onderskei en neem 5 paaltjies vir 22 lopies, wat 4 leë boulbeurte in sy toegelate 10 beurte ingesluit het. Welverdiend word hy dan ook as die man van die wedstryd aangewys.

Nog ‘n veelsydige Plasie-speler, Marais Botha, het 3 paaltjies vir 27 lopies geneem, wat een leë boulbeurt in sy 5 beurte ingesluit het.

Hendrik Botes word deur sy spanmaats gelukgewens.

Terwyl die groot kanonne hul teëstanders oorkant die dam besig gehou het, het die o.15’s op die Merensky-ovaal ook bewys dat hulle hul krieket ernstig opneem. Die Plasiespan het eerste gekolf en 76/10 in 30.2 beurte aangeteken. Die vreugdevure het hoog gebrand toe Hoërskool Ben Vorster se juniorspan slegs kon antwoord met 45/10 in 27.5 boulbeurte, wat vir die Plasiespan die wedstryd beklink het met 31 lopies.

Krieket o15 vs BV (1)
Voor: Wian Duvenhage, Wiollem Brits, Morné Huysamen, JP Botha, James Durant.
Agter: Rinaldo Bornman, Cashan Jacobsz, Xander Schoeman, mnr. Vicky Esterhuizen (afrigter), PG Botes, Leon de Lange, Luka Heinlein, Otto Muller.

Kolfuitblinkers van die wedstryd was James Durant met 10 lopies van 37 balle, JP Botha met 7 van 10 balle wat ‘n grenshou insluit, en Morné Huysamen met 7 lopies van 38 balle.

Die man van die wedstryd, Rinaldo Bornman, het aandag getrek met sy boulwerk. Hy het in sy 8 boulbeurte 4 paaltjies geneem waarvan 3 leeg was, en het slegs 10 lopies afgestaan.

Rinaldo Bornman.

Xander Schoeman het op sy beurt 6 beurte afgestuur, waarvan 3 leeg, vir slegs 5 lopies, terwyl hy 2 paaltjies geoes het. PG Botes het ook 2 paaltjies vir 14 lopies in sy 4 boulbeurte geneem, waarvan 1 leeg was. Leon de Lange het 2.5 boulbeurte afgestuur waarin hy 4 lopies afgestaan het terwyl hy ook 2 paaltjies laat kantel het. Na afloop van die liga glimlag Hoërskool Merensky se krieketkamp breed en bedank al hul entoesiastiese ondersteuners.

Rinaldo Bornman.

Foto’s: Mee. Marié Huysamen (o.15) & Ankia Botha (1e-span).