Garsfontein behou titel as kampioen van Noordelikes

Die Hoërskool Garsfontein se eerste seunshokkiespan het daarin geslaag om sy titel as kampioen van die Noordelikes Beker suksesvol te verdedig. Die Garsies het vir St. Alban’s College met 3-2 in die eindstryd van die kompetisie verslaan. Die toernooi is op Garsfontein se astrobaan oor die naweek aangebied. Die gasheer was ook algeheel as die kampioen van Pretoria aangewys na die o.14-span ook met die titel as kampioen weggestap het.

Die skool se o.16-span het ook tot die eindstryd deurgedring, maar moes na ‘n uitskietstryd met 4-1 teen Menlopark die knie gebuig. Die eindtelling na gewone speeltyd was 1-elk na die Parkies die gelykmakende doel op die sirene aangeteken het.

In die o.19-eindstryd teen St. Alban’s College het die Garsies teen rustyd ‘n voorsprong van 2-0 danksy doele deur Wilan Tollig en Wiehan van der Walt opgebou. Van der Walt het vroeg in die tweede helfte vanaf ‘n strafhoek sy tweede doel aangeteken om sy span se voorsprong na 3-0 te rek. St. Albans het in die laaste kwart sy twee doele aangeteken om hul vertoning meer aansien te gee. Garsies het hul plek in die eindstryd met ‘n sege van 4-2 na ‘n uitskietstryd teen Pretoria Boys’ High bespreek.  Daar was met die telling op 2-elk niks tussen die twee spanne te kies na gewone speeltyd verstreke was nie. Van der Walt en Stanis Combrinck het die wenspan se twee doele in gewone speeltyd aangeteken.

Garsies het in sy groepwedstryde onderskeidelik met die Noordelikes Uitnodigingspan (5-0), Waterkloof (3-2) en sy eie tweedespan (1-0) afgereken. Van der Walt het ‘n driekuns aan doele in die kragmeting teen die Noordelikes se Uitnodigingspan aangeteken.

Garsfontein se naasbestes het vanjaar ook aan die toernooi deelgeneem weens die feit dat die eerstes verlede jaar die kampioen was. Die naasbestes het uitstekend gevaar en danksy seges oor Midstream College (2-1) en Cornwall Hill College (1-0) se eerstespanne die vyfde posisie op die toernooi beklee. Pretoria Boys’ High het die Afrikaanse Hoër Seunskool van Pretoria in die uitspeelwedstryd om derde en vierde plek geklop.  Garsfontein se o.14-span het sy titel met ‘n sege van 2-0 oor Affies in die eindstryd. Die kampioen se twee doele in die kragmeting was deur Armand van der Vyver en Andrea Clerihew aangeteken

eerste hokkiespan

DIVAN GROBBELAAR, onderkaptein en verdediger van die Hoërskool Garsfontein se eerste hokkiespan, maak gereed om van die bal ontslae te raak tydens die jaarlikse Noordelikes Beker

FOTO: Karl Seebach