Die afgelope maand het Hoërskool Die Wilgers met groot trots deelgeneem aan drie toneelkompetisies: Allegretto Toneelfees, ATKV-Magneties en Pronk Podium. Hierdie feeste bied jaarliks aan jong akteurs die geleentheid om hul talent en kreatiwiteit te vier – en Hoërskool Die Wilgers se leerders het beslis nie
teleurgestel nie! Vanjaar het ons skool vier toneelstukke ingeskryf, naamlik: Wat joune is, is myne, GROOT, Gedagtes van die Toekoms en Victrix. Elke produksie het sy eie unieke tema en boodskap aan die gehoor oorgedra en die spelers se toewyding en harde werk is duidelik beloon. Daar is gelag en gehuil, gedans en met passie toneel gespeel. Na ure se harde werk en opoffering het die toneelleerders uiteindelik die vrugte van hul arbeid gepluk. Die toneelseisoen was ’n groot sukses: talle brons-, silwer- en selfs goue sertifi kate is deur die leerders verwerf. Hierdie prestasies dien as bewys van die skool se ryk kultuurtradisie en die óngeloofl ike talent wat by Hoërskool Die Wilgers gekoester word.

Aan diegene wat die toneelstukke misgeloop het, is daar ’n tweede geleentheid: op 2 Oktober 2025 vind die Interne Toneelaand in die Wilge Teater plaas. Hier kry ouers en leerders die geleentheid om vanjaar se produksies weer in hul volle glorie te ervaar. Hoërskool Die Wilgers nooi almal hartlik uit om hierdie spesiale aand saam met die leerders en opvoeders te beleef – ’n viering van kreatiwiteit, talent en die toekoms van Afrikaanse Toneel.