Laerskool Nelspruit het die inisiatief geneem om ‘n projek te loots om al die inheemse bome wat op ons skoolterrein voorkom te begin benoem. Dit is natuurlik ‘n baie tydsame proses en aan die einde van fase een, is ons trots om bekend te maak, dat Laerskool Nelspruit reeds met 32 inheemse boomspesies kan spog..

Die Nellies het mense genader wat bekend is vir hul liefde en kennis van bome om ons te kom help om die bome te identifiseer.

Oom Flipman du Plessis, afkomstig van Pretoria het aan die stuur van sake gestaan en hy is ondersteun deur plaaslike inwoners van Nelspruit, Kobus en Jeanette de Witt asook Neels Snyman wat die vervaardiging van die naambordjies behartig het.

Meer inligting oor Flipman du Plessis:

“My liefde vir die bome lei tot ‘n inheemse boomkwekery in Pretoria. So leer ek bome meer intens ken. In 2005 tree ek af en verhuis na ‘n natuurreservaat in die Thabazimbi-distrik. So word ‘n droom verwesenlik. Hier land ek tussen ‘n groep liefhebbers en kenners van inheemse bome. Baie ure en jare se passie en liefde vir bome. Dit is eerder n roeping, met ons leuse: BEKEND MAAK BEMIND.”

Baie dankie aan Mnr. Fourie du Plessis wat die projek geloots en geïnisieer het. “Ek het ‘n groot liefde vir die natuur, bome fassineer my ongelooflik baie!” Die doel van die projek is ook om die liefde vir die natuur by ons leerders te aan te hou kweek en belangstelling in bome te prikkel. Sover ons kennis strek is ons die enigste laerskool in die Laeveld/Mpumalanga/Suid-Afrika wat so ‘n projek al geloots het. Wat ons naambordjies so uniek maak is die QR-kode op die bordjies wat geskandeer kan word met ‘n slimfoon en onmiddelik kry jy dan meer inligting oor die betrokke boom. Ons kan nie wag om met die volgende fase te begin nie.