Die rugbyspanne van Laerskool Aliwal-Noord het Vrydag 17 April, in Trompsburg deelgeneem aan ’n opwindende rugbydag waar hulle waardevolle ondervinding opgedoen het en groot veggees getoon het.

Die o.7B-span het sterk verdedig en twee gelykopuitslae behaal teen Grey E en Willem Postma A. Hulle het egter naelskraap verloor teen Grey B (1–0) en in ’n opwindende wedstryd teen Colesberg net-net kort gekom met 3–2.

Die o.8B-span het teen taai opposisie te staan gekom en hoewel hulle nie oorwinnings kon behaal nie, het hulle waardevolle wedstrydervaring opgedoen teen Grey B, Burgersdorp en Grey D.

By die o.9-span was daar ’n uitstekende hoogtepunt toe LSAN ’n oortuigende oorwinning van 21–0 teen Koffiefontein behaal het. Hulle het egter ook teen ’n sterk Grey B-span vasgeval.

Die o.11B-span het ’n goeie oorwinning van 7–5 teen Reddersburg behaal, maar moes daarna die knie buig teen ’n sterk Burgersdorp-span.

Die o.13B-span het teen moeilike opposisie gespeel en waardevolle lesse geleer in hul wedstryde teen Reddersburg en Trompsburg.

Alhoewel die uitslae gemeng was, het al die LSAN-spanne deursettingsvermoë getoon. Hierdie ondervinding kweek harde spelers vir die toekoms.