Reeds op Maandag, 13 Januarie, het 286 senuweeagtige “Chicks” by Hoërskool Framesby aangesluit… Gewapen met pen en papier en gereed om ń paar toetse af te lê, het die rugbyveld gou in ‘n hoenderboerdery
verander! Ons hoogsgerespekteerde pluimveedeskundiges (Die Monitorbestuur) het dit egter reggekry om dié groep sommer vinnig tuis te laat voel! Die oriënteringskamp, wat Vrydagmiddag begin het, het ‘n interessante sottekonsert opgelewer, én die aand is afgesluit met ‘n spokerige speletjiesaand (wat veroorsaak het dat sommige leerders nóú nog na ‘n verlore plakkie of twee soek…) Saterdagoggend se pretdag en sonnige weer het veroorsaak dat die vreemde gesiggies mekaar sommer gou beter kon leer ken. Die naweek is Saterdagmiddag afgesluit met ‘n spesiale baadjieseremonie, waar die Framesby-Flitsies hul
laerskoolbaadjies vir hul hoërskoolbaadjie verruil het. Die vure het daarna vlam gevat en dit was die ouers se beurt om mekaar Saterdagaand beter by die bring-en-braai te leer ken. Ons is dankbaar om hierdie spesiale groep nou amptelik as Framesbiane te kan verwelkom! Me. H Strauss en Mnr. K De Villiers