Die Heuningberg Mediese Sentrum Tennisspan het vanaf 28 Februarie tot 3 Maart 2025 aan die Menlo MixitTennistoernooi by Sun City deelgeneem. Eintlik was dit vir die span ‘n droom wat bewaarheid is.Agt skole neem jaarliks aan hierdie baie gewilde toernooi deel. Spanne gaan tydens die toernooi in Sun City se Vacation Club tuis.

Hoërskool Bredasdorp se spelers het die geleentheid gehad om teen sterk kompetisie kragte te meet. Dis altyd  ‘n goeie uitdaging om teen sterk skole buite die Overber te kan meeding. In die rondomtalie-afdeling van die toernooi word spanne in twee groepe verdeel. In hierdie afdeling was HSB se beste uitslag ‘n naelbytstryd teen Hoërskool Nelspruit. Mieke en Melissa Saayman het teen HS Nelspruit hul enkelwedstryde gewen. In die gemengde dubbels het die volgende pare geseëvier: Mieke Saayman en Jan- Carel Lochner, Minke Terblanche en Luan Prins, asookMelissa Saayman en Daniël Fourie. Tussen al die tennisaksie was daar gelukkig genoeg tyd om Sun City ook te verken. Die spelers kon die Valley of Waves geniet en het ook twee aande hul vlughoue op die nuutgeboude Padel-bane, ingeoefen.

Die laaste twee dae speel spanne uit vir hul finale posisie in die toernooi. Hoërskool Bredasdorp moes eerstens kragte meet teen Hoërskool Midstream. Daar was baie op die spel en die afrigters en spelers was verstaanbaargespanne. Die wedstryde is egter steeds in baie goeie gees gespeel. Gelukkig het die Bredasdorpers hul beste tennis tot op daardie stadium in die toernooi opgelewer. Die volgende spelers het hul enkelwedstryde gewen: MinkeTerblanche, Nina Terblanche, Mikhululi Tundezwa en Daniël Fourie. In die gemengde dubbels het dievolgende kombinasies ook geseëvier: Minke Terblanche & Luan Prins, Nina Terblanche & Daniël Fourie, asook Lisa Bredell & Dirk Neethling. Hierdie oorwinnings het die span na die uitspeelrondte vir posisies vyf en ses laat deurdring. Hewige donderstorms het ongelukkig die finale uitspeelrondte onmoontlik gemaak. Die ongelooflikeervaring wat leerders op die toer opgedoen het, het gelukkig die teleurstelling van die gekanselleerde finaal oorskadu.

Die toernooi was veral vir ons matrieks ‘n wonderlike manier om hulle skole tennisseisoen op ‘n hoogtepuntaf te sluit. Hoërskool Bredasdorp se tennis waardeer die toewyding, entoesiasme en energie wat die matrieksMieke Saayman, Luan Prins, Minke Terblanche en Mkhululi Tundezwa vanaf 2021 na T4J gebring het.Baie dankie aan mnr Terblanche, tennisorganiseerder, vir ure se harde werk om hierdie spelers se tennisdroom te verwesenlik. Dankie ook aan mnr Terblanche en me Prins wat die groep vergesel het. Ook aan mnr Andries Swart vir die veilige rit na en van die lughawe af.