Ten spyte van ’n magdom moderne afleidings wat om jong kinders se aandag meeding, kan die bekoring van ’n boek nie maklik geklop word nie. Dít was duidelik op 23 April, toe Laerskool Gene Louw se grondslagfaseleerders ter viering van Wêreldboekedag besoek ontvang het van die gewilde kinderboekskrywer en aktrise Bianca Flanders.

Flanders het ’n groot groep opgewonde gr. 1- tot 3-leerders vermaak met ’n praatjie en ’n voorlesing, waarna hulle van haar boeke kon koop.

Daarbenewens het Lapa Uitgewers van 23 tot 25 April ’n boekuitstalling by die skool aangebied waar leerders asook hul ouers oor drie dae die kans gekry het om ’n verskeidenheid kinderboeke deur te kyk en te koop – en uit die aanvoelbare entoesiasme in dié lokaal kon ’n mens aflei dat ’n goeie storie op papier steeds groot toorkrag inhou.

Afgesien van haar geliefde kinderboekreeks oor die avonture van ’n meisie genaamd Pampoenpit (in Engels beskikbaar as die Pumpkin-reeks), is Flanders bekend vir haar rolle in TV-reekse soos Nêrens, Noord-Kaap en Troukoors. Sy het pas ook haar eenvrouteaterproduksie Karamonk by die Suidoosterfees in Kaapstad bekendgestel.

• Leerders van Laerskool Gene Louw het aan die aktrise en kinderboekskrywer Bianca Flanders se lippe gehang tydens ’n praatjie by die skool ter viering van Wêreldboekedag, 23 April.

•  Flanders het ook vir die leerder uit haar boeke voorgelees.

• Jean Loedolff (gr. 4), Katrien Roelofse (gr. 3), Connor Kidson (gr. 4), Christo Bruwer (gr. 3) en Arno Fourie (gr. 4) met hul gunstelingtitels tydens Lapa Uitgewers se boekuitstalling by Laerskool Gene Louw.

Jéma Swanepoel en Ava-Lee Moodley (beide in gr. 3) moes moeilike besluite neem om hul kopies uit te kies.