EHS-Kalistokamp: ’n kamp vir die boeke

Sewe Erries het vanaf Vrydag 24 Junie tot Maandag 27 Junie die jaarlikse Kalistokamp bygewoon te Kwasinungu Adventures. Na ‘n leemte van twee jaar waartydens daar nie gekamp kon word vanweë die Covid 19-pandemie nie, was die kamp ‘n welkome geestelike lafenis.

Die kamp is afgeskop met ‘n paar prettige ysbrekers gevolg deur ‘n heerlike lofprysingsessie, ‘n nagmars en laataand-koffie. Saterdagoggend het pastoor ZD en Lizd Büchling asook juf. Zara Büchling by die kamp aangesluit. Die leerders het ‘n geestelike bordspel geniet gevolg deur twee sessies wat onderskeidelik deur Lizd en Zara Büchling hanteer is. Pastoor ZD het die aand afgesluit met ‘n in-diepte Bybelstudie oor Joh. 5:1-17. Mnr. Hendry Lombard, eienaar en fasiliteerder, het Saterdagaand ook gesorg vir groot pret met ‘n paar oulike slimdink-speletjies.

Sondag het die leerders deur die boek Ester gewerk en in die namiddag gaan bergklim tot by die pragtige waterval op die plaas.  Met hul terugkoms by die kampterrein is daar ‘n paar hindernisbaan-items gedoen waarna die aand afgesluit is met die film ‘One Night with the King’, gebaseer op die boek Ester.

Die flukse sewetal het op Maandag die Berg Majuba gaan aandurf alvorens daar teruggekeer is huis toe. Alhoewel die Erries behoorlik gebibber het van die koue tydens die kamp, eer ons die Here vir die voorreg om in sy mooi natuur te kon gaan kamp en om dieper in die Woord te kon gaan delf. Ons sien uit daarna om weer ‘n jaarlikse instelling van die Kalistokamp te maak sodat elke Hoërskool Ermelo leerder ‘n lewende, aktiewe getuie kan wees in Gods koninkryk! Soli Deo Gloria!

V.l.n.r.: Daniël Mostert, Carla Bronkhorst, Leandri Lundall, Franco Gibbens, Abigail Ekermans, Andriët Boshoff, Monika Troskie

Die Erries het baie tyd intiem spandeer met God se woord. Hier is Franco Gibbens besig met sy persoonlike stilte tyd.

Abigail Venter (links) en Carla Bronkhorst (regs) tydens ‘n hindernis-aktiwiteit.