Voortrekkermonument gewilde bestemming vir skolebesoeke. Die Voortrekkermonument (VTM) het deur Septembermaand gasheer gespeel vir byna 2000 leerlinge, wat ons kultuurtuiste besoek het. Dié leerlinge kom vanaf verskeie staat-, privaat en tuisskole, in totaal 25 skole-instansies. Hierdie is ’n klinkklare bewys dat geskiedenis lééf en die jeug van vandag steeds opgewonde raak oor erfenis. Skole soos Impaq Homeschool, Abbotts College, Nong Primary School, CVO Skool Pretoria, Matiwane Combined School, Laerskool Bakenkop en Ema Primary het almal die kultuurtuiste besoek om te leer van die geskiedenis van Suid-Afrika en ons erfenis.

Opgewonde, energieke en geïnteresseerde jong leerlinge met verskeie agtergronde het heel maand die VTM se terrein platgeloop en kon deel in mekaar se geskiedenis. Fani Mmollowa, ’n onderwyser van die Nong Primary School, was vreeslik beïndruk met die toestand van die terrein, die kwaliteit van die toerbegeleiding van sy skoolgroep en het baie gehou van die verskillende aktiwiteite wat aangebied is. Dié skool het nie net geleer van die geskiedenis van die Groot Trek nie, maar het by die Pioniersentrum geleer hoe die pioniers van ouds brood gebak het: nie in die oond met meel wat ons in die winkel koop nie, maar dat álles self gemaak moes word, selfs die oond.

Altus Hanekom van CVO Skool Pretoria

Broodbak demonstrasie deur Godfrey Zake vir Pepps College

CVO Skool Pretoria

Laerskool Bakenkop het kom kuier en een brawe Bakie het sy hand opgesteek om kanon Susanna af te vuur

Nong Primary School juig Susanna toe

Susanna, die kanon, Danie Dreyer saam met Nong Primary School

Alhoewel al die besoekpunte interessant is, is dit Susanna wat deur die bank die meeste geniet word. Susanna, ’n ou skeepskanon wat by Fort Schanskop afgevuur word, bly ’n gunsteling. Altus Hanekom (11) van CVO Skool Pretoria, is self lief vir geskiedenis en is van mening dat die Voortrekkermonument “nogal weet waarvan hulle praat”. Hanekom vertel opgewonde: “Die toer was baie interessant! Die beste was om van heel bo in die monument af te kyk na onder.” Sy klasmaats het die nuutste Vrijheidsreis-uitstalling insiggewend gevind, waarna hulle ook in die voetspore van die ou trekkerleiers in die Historiese Trekroetetuin gestap het. Met soveel om te doen op die VTM-terrein, só ’n ryke erfenis en tonne opwindende toere, is dit geen verbasing dat soveel skole kies om hul uitstappies hier deur te bring nie.