Judo Kompetisie 

Tydens Laerskool Gene Louw se  weeklikse saalbyeenkoms, het die volgende leerders erkenning ontvang vir hul prestasies:

Judo-kompetisie:  Joshua Marais het aan ’n judo-kompetisie in Paarl deelgeneem. Hy het ’n medalje vir ’n vierde plek in sy kategorie ontvang.

Stoei:

De Wet Brummer het op 14 Maart aan ’n stoeikompetisie deelgeneem en goud verower in die o/8-kategorie. Hy het ook aan die Gertjie van der Merwe-toernooi deelgeneem, waar hy goud verower het in die o/7-vrystylstoei.

SA Tweekampkampioenskappe:

Elea Smith is gekies om die Boland o/9A-span te verteenwoordig by die jaarlikse Highgate Interprovinsiale Tweekampkampioenskap in Oudtshoorn. Hy is ook aangewys as die nommer een seun in die Boland o/9-tweekampspan.

Elea het aan die Suid-Afrikaanse Tweekampkampioenskappe op 21 Maart in Oudtshoorn deelgeneem, waar 868 atlete uit 14 streke meegeding het. Hy het ’n welverdiende bronsmedalje in die seuns o/9-afdeling verower.

WP JKA Karate:

Kira het op 7 Maart aan die WP JKA Karate-kampioenskap in Kaapstad deelgeneem. Sy het goud verower in beide die kata- en kumite-afdelings. Sy is dus die dubbele WP-kampioen en het haar WP-kleure verwerf.

Judo:

Wicus van Rensburg het eerste plek behaal by die Cape Winelands Judo-toernooi in die o/9-ouderdomsgroep (onder 38 kg).

WP Binnenshuise Krieket:

Luanco Robson se span het ’n goue medalje ontvang in die WP binnenshuise krieket Junior E2-liga vir die Panthers, asook ’n goue medalje in die E1-liga vir die o.10 WP-span.

WP Schools Cycling:

Mila Josling het aan die WP Schools Cycling-kompetisie by Devonbosch deelgeneem en ’n derde plek behaal.

Wilson-tennistoernooi:

Simon Walters het ’n eerste plek behaal in die seuns o/9-afdeling. Emma Verhage het ’n silwermedalje verower in die dogters o.9-afdeling, en Rudolph Koen het ’n bronsmedalje verower in die seuns o.9-afdeling.

Weskus Marathon:

Ava Fourie het op 14 Maart aan die Weskus Marathon se 5 km Fun Run deelgeneem.

Bergfietsry:

Isabelle Laubscher het op Saterdag, 14 Maart, aan ’n bergfietsry-kompetisie by Bloemendal deelgeneem.

Slot:

Baie geluk aan ons grondslagfase-genie-sterre. Ons is ongelooflik trots op julle!