Die Boknes Verkenner en Kaba Selfbehoudkamp is ‘n jaarlikse hoogtepunt vir Oos-Kaap Voortrekkers. Gedurende die Maart skoolvakansie kom kinders van reg oor die Oos en Noord Kaap om hierdie lekker kampe by te woon. Die graad 10-groep het twee nagte by die Karel Landman museum deurgebring waar hulle die Afrikaner-Geskiedenis kenteken voltooi het. Die jeuglede moes sonder storte klaarkom en al hulle kos op die vuur maak. Daarna het hulle die Voetslaner-kenteken see langs aangepak. Lekker gees en hulpvaardigheid was ‘n kenmerk van die graad-10 groep. Die graad 9’s het die veeleisende Strandvernuf-kenteken aangepak. Hulle het skuilings in die duine gebou en daar geslaap, Dias-kruis toe gestap en die kamp afgesluit met ‘n heerlike visbraai. Daar is lekker gesing en gespeel soos net Voortrekkers kan. ‘n Graad 8 groepie het saam met die graad 9’s in die duine gaan skuilings bou. Gelukkig het die weer vanjaar saamgespeel en skuilings het nie weggewaai nie. Hulle het vlotte gebou en in die strandmeer geroei. Dit was ‘n lekker groep vriende wat goed saamgewerk het. Hulle het die Seekunde en Roeikunde kentekens suksesvol voltooi. Die graad 7’s het ‘n voorsmakie van die Verkennerlewe gehad toe hulle Medemenskamp gedurende die Boknes-Verkennerkamp aangebied is. Hulle het rotspoele bekyk, Boknes se strate ingevaar om vir die oumense koekies uit te deel en ook Dias-kruis toe gestap. Hulle het die Medemens- en Strandbewustheid-kentekens suksesvol afgehandel. Kaba-selfbehoudkamp het hierdie jaar tien vasberade selfbehouders gehad. Ongelukkig moes ons Selfies hulle man (en vrou) staan teen die 6 Buitegroeplede wat in die veld vir die week op hulle eie oorleef het. Kaba-kamp het bestaan uit 4 afsonderlike opleidingsdae nl. Veldkuns, Boskuns, Seedag en die algemene dag waar hulle meer van noodhulp, kaartwerk en selfverdediging geleer het. Die Selfies het kundighede aangeleer om hulle voedsel uit die veld en see te kan bekom en hulleself te kamofleer om in te smelt by die natuur. Hulle kan ook nou vuurmaak en water verkry uit verskeie bronne in die natuur. Die Buitegroep het hulle goed van hulle taak gekwyt om hierdie week te oorleef uit die veld. Om Selfbehoud te doen is emosioneel en fisies moeilik, maar ons kan met trots sê dat hierdie Verkenners baie geleer het van hulle self en waarde daaruit kry vir die toekoms. Die Selfbehoud kenteken is ‘n unieke ervaring en ’n eenmaal in jou lewe geleentheid wat vir elke Voortrekker onmisbaar is.