Lees die spesiale uitgawe vir die Classic Clash tussen Bastion en Van Riebeeckstrand hier. Dis propvol spanfotos, onderhoude en al die aksie.  Ons gesels met die rugby eerstespankaptein van Laerskool Bastion – Jean Strydom.

Jean Strydom

Hoe was die voorseisoen vir hierdie span, en wat het dit vir julle gewys oor die groep se karakter, ingesteldheid en toewyding?Ons o.13-voorseisoen het reeds in Desember begin met ’n streng oefenprogram wat elke speler moes volg. Dit het ons gehelp om fiks en voorbereid die jaar te begin. Ons het op ’n voorseisoentoer na Riversdal gegaan, asook aan die Eikestad-toernooi en die Kobus Wiese Super Series deelgeneem. Ons het daar as ’n span vir mekaar gespeel, hard gewerk en by albei toernooie as algehele wenners weggestap.

Wat maak vanjaar se eerstespan anders as vorige spanne, en hoekom moet ondersteuners opgewonde wees om julle hierdie seisoen te sien speel? Hierdie span is anders omdat ons al lank saam speel. Ons het ’n goeie kombinasie van Graad 7- en Graad 6-spelers, en dit werk baie goed. Ondersteuners moet opgewonde wees omdat ons alles op die veld opoffer en as ’n span saamspeel. Baie mense mag ons dalk onderskat, maar ons is gereed om hulle verkeerd te bewys.

Wat gaan deur jou kop voordat jy die veld in jou skoolkleure betree, en wat beteken dit vir jou persoonlik? Ek onthou hoe ek na die ou eerstespanne opgekyk het, en nou is dit my beurt om vir jonger spelers ’n voorbeeld te stel. Rugby het vir my ongelooflike geleenthede gegee. Ek het nuwe vriende gemaak, myself leer ken en geleer dat jy op jou spanmaats kan vertrou wanneer jy uitdagings in die gesig staar.

Elke sterk span het sy eie identiteit — hoe sal jy julle span se speelstyl, ingesteldheid en gees beskryf? Ons begin soms ’n bietjie skrikkerig, maar sodra die wedstryd aan die gang kom, onthou ons hoe hard ons gewerk het en vir wie ons speel. Dan skop die selfvertroue in. Ons spangees is baie sterk. Ons motiveer mekaar, speel soos broers en tel mekaar op wanneer iemand ’n fout maak. Ons breek nie mekaar af nie — ons staan saam.

Watter standaard het jy en jou span vir julself hierdie seisoen gestel, buiten net om wedstryde te wen? Ons wil die jaar geniet, goeie spangees bou, goeie ambassadeurs vir die skool wees en herinneringe maak wat vir altyd by ons sal bly. Ons wil ook wys dat hierdie span anders is as vorige eerstespanne.

Watter wedstryd staan vir jou die meeste uit op die kalender, en wat maak daardie wedstryd so belangrik vir die span? Randhart by Wildeklawer staan vir my uit, want dit is ons eerste wedstryd by ’n groot toernooi waar baie sterk skole deelneem. Dit is waar ons onsself kan meet en regmaak vir die seisoen. Durbanville is ook altyd ’n groot wedstryd — dis daardie een wat jy altyd wil wen.

Wie in hierdie span dink jy gaan mense hierdie seisoen verras, en wat maak daardie speler iemand om dop te hou? Enzo Venter gaan mense verras. Hy het van o.10 af in die B-span begin, maar het ongelooflik hard gewerk en homself baie verbeter. Nou is hy in die o.13A-span, was saam met my in die span van die toernooi by die Kobus Wiese Super Series, en het ook deurgedring na rondte 2 van die WP-proewe. Hy het ’n groot impak op ons span en is iemand om dop te hou.

Wat leer hierdie sport by jou skool vir spelers wat verder gaan as net wat op die veld gebeur? Rugby leer jou om groot te mik, dissipline te hê en nederig te bly, veral wanneer jy wen. Dit leer jou ook om jou afrigters te vertrou en op jou spanmaats staat te maak. Vir my het rugby my lewe verander. Dit het my geleer om in myself, my vriende en my span te glo. Sonder rugby sou ek nie dieselfde mens gewees het nie.

As kaptein, watter tipe leier wil jy hierdie seisoen vir jou span wees, en watter voorbeeld wil jy stel? Ek wil ’n leier wees wat die span se energie kan lig wanneer dinge moeilik gaan. Ek wil jonger spelers wys dat jy jou kop moet oplig ná ’n fout, weer moet probeer en altyd nederig moet bly. Ek wil ook wys dat harde werk jou ver kan bring. Ek was WP o.12A-kaptein deur harde werk, en ek wil ander wys dat enigiets moontlik is as jy bereid is om daarvoor te werk.

Wanneer mense julle span hierdie jaar sien speel, wat hoop jy sal hulle ná die tyd oor die groep sê? Ek hoop mense sal praat oor hoe goed ons saam speel, hoe ons vir mekaar speel en hoe ons bereid is om ons liggame op die spel te sit vir die span. Ek wil ook hê hulle moet sien dat die sukses van die o.13A-span nie net oor die A-span gaan nie, maar oor elke speler in die B-, C- en D-spanne wat sy kant bring. Ons is een groep, en almal speel ’n rol in die sukses.