Hoërskool Langenhoven se netbalspanne het op Dinsdag 14 April na Mosselbaai gereis waar hulle teen Hoërskool Punt kragte gemeet het. Altesaam 8 bussies met ongeveer 124 leerders het vertrek om die skool te verteenwoordig in ’n vol program van wedstryde.

Ten spyte daarvan dat Hoërskool Punt byna drie keer soveel dogters in die skool het, het die Dasse uitstekend meegeding en 8 van die 18 wedstryde gewen, met een wedstryd wat gelykop geëindig het.

• Die o/14-spanne het goeie veggees getoon. Die o/14B-span het met 12–10 gewen, terwyl die o/14A-span ’n sterk vertoning gelewer het met ’n 22–11 oorwinning.
• By die o/15-ouderdomsgroep het die o/15D-span met 9–8 gewen en die o/15C-span het 11–11 gelykop gespeel. Die o/15A- en o/15B-spanne het harde wedstryde gehad en ongelukkig naelskraap verloor.
• Die o/16-spanne het ook hul staal gewys, met die o/16C-span wat ’n goeie 12–6 oorwinning behaal het.
• In die o/18-afdeling het verskeie spanne uitstekende oorwinnings behaal. Die o/18E-span het 25–4 gewen, die o/18D-span 23–9, en die o/18C-span 19–5. Die tweede span het naelskraap 18–20 teen Punt se o/17A-span verloor.

Die hoogtepunt van die dag was die eerste span se wedstryd wat tot die laaste oomblikke spannend was. Die Dasse het uiteindelik met ’n naelskraap oorwinning van 26–25 geseëvier.

Hoërskool Langenhoven is trots op al die spelers se deursettingsvermoë, spanwerk en veggees op die baan. Hierdie dag het weereens gewys dat die Dasse, ongeag die grootte van die opposisie, altyd met trots en vasberadenheid kompeteer.

Nog ’n groot hoogtepunt vir Hoërskool Langenhoven se netbal was die Eden- en Sentraal-Karoo-proewe wat op Vrydag 10 en Saterdag 11 April op die skool se eie bane plaasgevind het. Altesaam 39 Langenhoven-dogters het aan die proewe deelgeneem, waarvan 24 spelers deurgedring het na die Weskaap-proewe wat op 22 en 23 Mei weer by Hoërskool Langenhoven aangebied sal word. Hierdie uitstekende prestasie beklemtoon die hoë standaard van netbal by die skool en die groot hoeveelheid talent wat in die Dasse-geledere beskikbaar is.