Woendag, 14 Januarie 2026 was ‘n baie spesiale dag vir Laerskool Vredekloof. Dit word as ‘n hoogtepunt beskou, aangesien die leerders wat nou in Graad 7 is, die eerste groep volledige Graad R’e van Laerskool Vredekloof was. Die huidige Graad 7- leerders het in 2019 hul skoolloopbaan by Laerskool Vredekloof begin. Hierdie spesiale oomblik was gevier deur die Graad 7’s wat terug gaan na die plek waar hul skoolreis begin het. Die Klofies het weer by hulle Graad R klas gaan kuier. Die opvoeders het vir hulle die stories gelees wat hulle agt jaar gelede reeds gehoor het, hulle het met die klein Klofies se speelgoed gespeel en by hulle tafels gesit en teken.

Hierdie Graad 7’s was agt jaar gelede nog klein, nuuskierig en het die groot skool met groot oë aangekyk, nou is hulle selfversekerde Graad 7-leerders wat aan die einde van daardie reis staan. “Dit is ‘n ware volsirkel-oomblik en ons is trots om te sien hoe hierdie leerders gegroei het. Ons is buitengewoon trots om hierdie leerders deel van ons Klofie-geskiedenis te hê. Dit is vir ons as Laerskool Vredekloof ook baie lekker om te sien hoe die jaargroep se getal ook gegroei het mettertyd.” sê ‘n woordvoerder van die skool.

Hierdie groep Klofies is die eerste volledige groep Klofies wat in 2019 hul skoolloopbaan by Laerskool Vredekloof begin het.

Die Graad 7 leerders sit op die mat by die Graad R juffrouens, Mev. Marina Snyman en Mej. Taneal Rocher, wat vir hulle ‘n storie lees.