Ons gesels met Mila Havinga, kaptein van Hoërskool Stellenberg se eerste netbalspan oor hul voorbereiding, sterkpunte en vooruitsig vir die seisoen. Mila vertel wat haar span uniek maak en hoe hulle beplan om die uitdagings wat voorlê aan te pak.

Voorbereiding vir ’n gedenkwaardige netbalseisoen

Die netbalspan van Hoërskool Stellenberg is vasbeslote om 2025 ’n jaar te maak om te onthou, met kaptein Mila Havinga aan die stuur. Ek het met Mila gesels om insig te kry in hoe die span hulle voorberei het vir die uitdagings wat voorlê.

Hoe het die span hulle vir die seisoen voorberei, en op watter aspekte van die spel het julle gefokus?
“Ons span het deeglik voorberei. Oefeninge het reeds in November verlede jaar begin, en ons het baie tyd en harde werk ingesit met oefensessies vroeg in die oggend en laat in die middag. Gedurende hierdie sessies het ons gefokus op kommunikasie en tydsberekening op die baan. Verder het ons spanbou-aktiwiteite gedoen om ons geestelik voor te berei, en aan verskeie toernooie deelgeneem om mekaar beter op die baan te leer ken.”

Wat dink jy maak julle span hierdie jaar mededingend?
“Een van ons grootste sterkpunte is die oorvloed talentvolle spelers in die span. Ons komplementeer mekaar se sterk- en swakpunte, wat ons in staat stel om as ’n eenheid vinnig en doeltreffend oor die baan te beweeg.”

Wat beteken dit vir jou om jou skool as ’n eerstespan-speler te verteenwoordig?
“Dit is ’n enorme voorreg. Dit bewys nie net my harde werk en toewyding nie, maar gee my ook die kans om met trots vir my skool en spanmaats te speel. Dit is vir my ’n eer om my passie vir die sport en lojaliteit aan my skool op die baan te wys.”

Watter doelwitte het julle span vir die komende seisoen gestel?
“Ons doelwit is om altyd ons beste te gee en nooit op te gee nie. Ons mik daarna om eerste te eindig by Affies en Wildeklawer – nie net vir die trofee nie, maar ook om ons skool se naam met trots te dra. Aan die begin van die jaar het elke speler persoonlike en spandoelwitte neergeskryf. Ons herinner mekaar gereeld daaraan en sien uit om te sien hoe die seisoen ontvou.”

Watter span of toernooi beskou jy as julle grootste uitdaging hierdie seisoen?
“Ons grootste uitdaging is beslis die Wildeklawer-toernooi. Daar is ’n groot verwagting van ons eerstespan, aangesien dit die eerste keer in twee jaar is dat Stellenberg se o.19-span weer daaraan deelneem. Ons sien egter baie uit na die kompetisie!”

Watter netbalster of sportpersoonlikheid bewonder jy, en hoekom juis hy of sy?
“Ek bewonder Courtney Bruce, die Australiese netbalspeler. Sy is my rolmodel omdat sy nooit moed opgee nie. Sy toon sterk leierskap en het ’n diep passie vir die sport – beide op en van die baan af.”

Wat wil julle as ’n span in 2025 bereik?
“2025 gaan ’n netbaljaar wees wat nog lank onthou sal word! Ons is gereed om ons skool met trots te verteenwoordig, en gaan elke wedstryd aanpak met toewyding en deursettingsvermoë.”

Hierdie inspirerende woorde van Mila Havinga getuig van die vasberadenheid en toewyding van Hoërskool Stellenberg se netbalspan om hul merk te maak in die netbalwêreld van 2025.