Laerskool Witpoort is sedert 1904 ‘n unieke skool. Selfs vandag nog is die plaasskool net buite die Ooste van Pretoria baie spesiaal. Een van die plaasskool se drome was om ‘n mascot te kry wat eie is aan die omgewing en deel kan vorm van ons familie. Daarom het ons op ‘n meerkat genaamd, Sikara, besluit. Sikara beteken “braaf”. Buiten dat ons meerkatte het wat elke nou en dan by die skool kom kuier kan ons baie vergelykings tref tussen ‘n kolonie meerkatte en die mensdom. Meerkatte staan altyd kiertsregop om ver te kan sien, hierdie eienskap is ook eie aan ons Witties. Ons staan trots en droom groot vir elke leerder se toekoms. Witpoort is slegs ‘n gedeelte van elke Wittie se reis. Meerkatte is beslis dinamiet in klein pakkies. Witpoort is ‘n klein skool, maar ons staan vir niks en niemand terug nie. Ons leerders blink uit waarookal hul hulself bevind. Die liewe meerkat is getrou aan sy groep. By Witpoort is ons ‘n familie, getrou en lojaal aan mekaar en ons skool. Ons geskiedenis en alma maters wat terugkeer getuig ook hiervan.

Meerkatte doen buurtwag met ‘n glimlag, ons leerders is gelukkige kinders wat nog kaalvoet kan leer, speel en baljaar. Waar kinders nog kind kan wees. Sikara is amptelik bekend gestel aan ons leerders, personeel en ouers op Vrydag 4 Maart. Die opbou na hierdie dag was baie opwindend. Sikara het ‘n kreet waarmee hy geroep word sodat almal kan weet dat ons brawe Sikara oppad is.

Tydens die bekendstellingsgeleentheid is Sikara met ‘n helikopter afgelaai by die skool. ‘n Stampvol pawiljoen van opgewonde kinders en ouers het Sikara ingewag. Sikara is geroep met sy kreet waarna hy vir ons gewys het dat hy nie net ‘n meerkat is nie, maar ‘n dansende meerkat.