Elizma le Roux (graad 11) van Hoërskool Zwartkop  is vanjaar se Suid-Afrikaanse kampioene in die 2000m Hindernis vir dogters o.17.  Elizma het hierdie gesogde titel tydens die S.A. Skole Kampioenskappe wat in die Paarl plaasgevind het, verwerf.

Maar Elizma se storie is een van volharding en geloof.  Geloof in die Here om haar die geleentheid te gee om haar talente aan Hom op te dra en Sy naam tydens haar prestasies groot te maak.  En dit is ook presies wat met Elizma tydens die seisoen gebeur het.  “Elke jaar tydens die oefenkamp aan die begin van die seisoen, gee coach Willie ons elkeen ‘n opdrag om ‘n doelwitplakkaat saam te stel.  Vanjaar was my doelwit om die Here woord te versprei in elke resies wat ek hardloop.”  Elizma het vanjaar met elke resies, haar persoonlike tye verbeter en haar geheim was om nie angstig te raak voor óf tydens ‘n wedloop nie.  “Ek het geweet dat die Here ‘n plan vir my het, ek het begin vertrou in die Here se plan vir my.  Dit het al die angs in my weggevat” is Elizma se woorde.  Die dag voor die Interhoër het sy op haar knieë gegaan en die Here gevra om haar te help getuig oor alles wat Hy vir haar doen.

‘n Dag voor die Suid-Afrikaanse kampioenskappe in die Paarl, het sy geval tydens ‘n opwarmingsdraf en seergekry.  Dit het haar egter nie gekeer om die volgende dag die 2000m Hinderkampioen te word nie.  Buiten vir haar pragtige goue medalje, het Elizma die 12de beste prestasie van al die atlete by die kampioenskappe behaal.  Sy het ‘n ASA-tabelpunt van 989 gekry en is aangewys as die beste dogter baanprestasie van die kampioenskappe.  So het Elizma haar hartswens vanjaar bewaarheid en gebruik sy dié platvorm om die Here se plan vir haar lewe met ander te deel. Baie geluk, Elizma le Roux!