Rekords spat by Hoërskool Zwartkop se Interhuissport. Dit was ‘n snikheet dag op 17 Januarie toe die Zwarries se Zarwas, Korwas en Warlas mekaar die stryd aangesê het.  Op dié dag het die atlete egter nie teleurgestel nie en is vele nuwe rekords opgestel en persoonlike beste prestasies behaal.

‘n Totaal van 13 rekords is tydens die byeenkoms aangeteken.  Michelle Groenewald het ‘n 10 jaar oue rekord in die 400m hekkies vir dogters o.17 vernuwe.  Haar tyd was 1:06,26s.  Anika Williams het die rekord in die 400m hekkies vir dogters o.19 opgestel met ‘n tyd van 1:05,82s.  Reghardt Naudé het die rekord vir die seuns o.15 300m hekkies in ‘n tyd van 42,16s verbeter.  In die hoogspring seuns o.17 kompetisie het F.J. Reeder ‘n rekordhoogte van 1,88m aangeteken.

Rico Coetzer het die seuns o.16 800m in ‘n rekordtyd van 2:01,25s gewen.  Li-Mari verbeter die 800m vir dogters o.19 met ‘n tyd van 2:13,24s en sy stel ook ‘n nuwe rekord in die 1500m wedloop op in ‘n tyd van 4:38,11s.  Minke Dekker het nog ‘n pragtige rekord opgestel nadat sy die 1500m vir dogter o.14 in ‘n tyd van 04:42,43s gewen het.  Luan Williams het die seuns o.16 110mH rekord met ‘n tyd van 14,55s verbeter.  Nóg ‘n rekord, hierdie keer in die seuns o.17 110mH is opgestel deur Rheinhardt Beyers en sy tyd was 14,73s.  Li-Mari Dekker het nog ‘n rekord agter haar naam opgeskryf in die vorm van die 400m dogters o.19 met ‘n tyd van 1:00,63s.  Laastens het Micsha van der Schyff die dogters o.17 driesprongrekord met ‘n afstand van 10,60m verbeter.

Huissport Li-Mari Dekker in aksie

Tydens die afloswedlope het vele van die spanne die rekords van die verskeie ouderdomme verbeter.  Dit dui daarop dat die Zwarries in puik kondisie is met die oog op die komende 2023 seisoen. Dit was nie net die atlete wat die dag aan die gang gehou het nie, maar die res van die Zwarries het die atlete met ywer ondersteun.  Die Zarwa-dirigente was vanjaar vuur en vlam met hul Zarwa-heist tema.  Die Korwas het uitgestaan in hul Top Gun uitrustings en die Warlas was Griekse gode vir hierdie geleentheid.  Mnr. Willie Engelbrecht (atletiekorganiseerder) is baie opgewonde oor die komende seisoen en daar word groot dinge van die Zwarrie-atlete verwag.  Baie geluk aan elke atleet wat deelgeneem het en baie dankie aan elke ondersteuner wat die dag ‘n sukses gemaak het.