Lees die spesiale uitgawe vir die Classic Clash tussen Welkom Gim vs Goudveld hier. Dis propvol spanfotos, onderhoude en al die aksie. Ons gesels met die hokkiedogters eerstespankaptein van Goudveld -Hoërskool-Carla de Jonge.

Carla de Jonge

Hoe was die voorseisoen vir hierdie span, en wat het dit vir julle gewys oor die groep se karakter, ingesteldheid en toewyding? Die voorseisoen het vir ons gewys hoe hard hierdie span bereid is om te werk vir mekaar. Ons het definitief as ’n groep nader gegroei en almal bring goeie energie en toewyding elke dag.

Wat maak vanjaar se eerstespan anders as vorige spanne, en hoekom moet ondersteuners opgewonde wees om julle hierdie seisoen te sien speel? Ek voel wat hierdie span anders maak, is hoe goed ons mekaar bystaan en ondersteun. Daar’s ’n baie lekker spangees en ek dink mense kan opgewonde wees om die intensiteit en passie te sien waarmee ons speel.

Wat gaan deur jou kop in die oomblikke voordat jy die baan of veld in jou skoolkleure betree, en wat beteken daardie geleentheid vir jou persoonlik? Net voor ek die veld opstap, dink ek meestal aan hoe trots ek is om my skool te verteenwoordig. Dit is altyd ’n spesiale gevoel om saam met hierdie groep besonderse meisies in ons skoolklere uit te hardloop.

Elke sterk span het sy eie identiteit — hoe sal jy julle span se speelstyl, ingesteldheid en gees beskryf? Ek sal ons span beskryf as hardwerkend, energiek en baie verenig met vreeslike goeie gees! Ons speel met baie passie en ons gee nie maklik op nie , as iemand hul kop sak help die res haar op.

Watter standaard het jy en jou span vir julself hierdie seisoen gestel, buiten net om wedstryde te wen? Buiten wen, wil ons hierdie seisoen konstant groei as spelers en as mense. Ons wil standaarde stel waarop ons trots kan wees, op en van die veld af.

Watter wedstryd staan vir jou die meeste uit op die kalender, en wat maak daardie wedstryd so belangrik vir die span? Derby is definitief een van die grootste wedstryde op die kalender. Dis belangrik vir die span omdat daar altyd baie trots, energie en ondersteuning agter dit is.

Wie in hierdie span dink jy gaan mense hierdie seisoen verras, en wat maak daardie speler iemand om dop te hou? Bella Kruger is ‘n speler om dop te hou , van laas seisoen tot die jaar het ek soveel groei in haar spel waargeneem, sy gaan ‘n groot impak die seisoen maak.

Wat leer hierdie sport by jou skool vir spelers wat verder gaan as net wat op die baan of veld gebeur? Hokkie leer jou baie meer as net wat op die veld gebeur, dit leer ons dissipline, respek, spanwerk en hoe om onder druk kalm te bly.

 As kaptein, watter tipe leier wil jy hierdie seisoen vir jou span wees, en watter voorbeeld wil jy stel? Ek wil ’n kaptein wees wat altyd bereid is om my alles te gee vir die span en te kan se ek los als op die veld wanneer ek af stap. Ek wil lei deur voorbeeld en altyd ondersteunend en positief wees.

 Wanneer mense julle span hierdie jaar sien speel, wat hoop jy sal hulle ná die tyd oor die groep sê? Ek hoop mense sien ’n span wat vir mekaar speel, God verheerlik op en van die veld af en met trots met die wapen op ons bors op die veld draf.