Lees die spesiale uitgawe vir die Classic Clash tussen Monnas en Nories hier. Dis propvol spanfotos, onderhoude en al die aksie.  Ons gesels met die rugby eerstespankaptein van Hoërskool Noordheuwel- Kean Lourens.

Kean Lourens

Hoe was die voorseisoen vir hierdie span, en wat het dit vir julle gewys oor die groep se karakter, ingesteldheid en toewyding? Ons span het die afgelope paar weke teen baie sterk spanne gespeel en baie geleer oor waar ons op én van die veld af kan verbeter. Ons sterkste karaktereienskap is dat ons nooit sal ophou veg nie.

Wat maak vanjaar se eerstespan anders as vorige spanne, en hoekom moet ondersteuners opgewonde wees om julle hierdie seisoen te sien speel? Ons het verseker meer matrieks vanjaar as wat ons verlede jaar gehad het. Ondersteuners moet ons wedstryde kom kyk, want ons het die ondersteuning nodig. Ons is ’n span wat onverwags dinge op die veld toepas.

Wat gaan deur jou kop voordat jy die veld in jou skoolkleure betree, en wat beteken daardie geleentheid vir jou persoonlik? Die oomblik wat ek die veld betree, dank ek my Hemelse Vader vir nog ’n geleentheid om my span te lei en te speel. Ek voel altyd dankbaar dat ek die kaptein van my span kan wees.

Elke sterk span het sy eie identiteit — hoe sal jy julle span se speelstyl, ingesteldheid en gees beskryf?Ons het baie respek vir mekaar en ons afrigters. Ons speel baie deur ons voorspelers, omdat ons ’n baie dominerende pak het. Ons spangees is baie sterk, en ons dryf mekaar om die beste uit mekaar te kry.

Watter standaard het jy en jou span vir julself hierdie seisoen gestel, buiten net om wedstryde te wen?Ons wil alles doen tot eer en verheerliking van ons Hemelse Vader, en altyd nederig bly.

Watter wedstryd staan vir jou die meeste uit op die kalender, en wat maak daardie wedstryd so belangrik vir die span?Hoërskool Monument staan vir my uit, want dit is die wedstryd wat bepaal wie die beste in ons dorp is. Dit is ook belangrik vir toekomstige leerders wat moet besluit na watter hoërskool hulle wil gaan, en daarom is dit ook belangrik vir ons skool se bemarking.

Wie in hierdie span dink jy gaan mense hierdie seisoen verras, en wat maak daardie speler iemand om dop te hou?Ek dink Llewellyn Lourens, ons oopkantflank (6), is een van ons uitstaande spelers. Hy het verlede jaar aan die begin van die seisoen sy kakebeen gebreek en kon die hele jaar nie speel nie. Hierdie jaar is hy verseker iemand om dop te hou, veral oor die manier waarop hy die bal dra, duikslagte maak en balle steel.

Wat leer hierdie sport by jou skool vir spelers wat verder gaan as net wat op die veld gebeur?Dit leer jou om saam as ’n span te werk en dat jy as mens nie alle doelwitte alleen kan bereik nie.

As kaptein, watter tipe leier wil jy hierdie seisoen vir jou span wees, en watter voorbeeld wil jy stel?Ek wil deur voorbeeld lei. Ek wil as kaptein my spelers leer dat rugby iets is wat jy doen, maar nie wie of wat jy is nie. Ek wil iemand in hul lewens wees na wie hulle eendag kan terugverwys en sê dat ek vir hulle ’n lewensles geleer het.

Wanneer mense julle span hierdie jaar sien speel, wat hoop jy sal hulle ná die tyd oor die groep sê? Dat hierdie span altyd saam deurgedruk het, maak nie saak wat die omstandighede was nie. Ek hoop hulle sal sien dat ons ’n gelowige en nederige span is wat alle eer aan ons Hemelse Vader gee.