Lees die spesiale uitgawe vir die Classic Clash tussen Monnas en Nories hier. Dis propvol spanfotos, onderhoude en al die aksie.  Ons gesels met die rugby eerstespankaptein van Hoërskool Monument – Ryno van der Westhuizen.

Ryno van der Westhuizen

Hoe was die voorseisoen vir hierdie span, en wat het dit vir julle gewys oor die groep se karakter, ingesteldheid en toewyding? Die Witbulle se voorseisoen was gevul met aksie, bloed en sweet. Elke speler het sy sterk karakter gewys, op en van die veld af. Of dit nou was om op te daag vir harde oefensessies of om hul lywe op die lyn te sit teen goeie spanne, almal het gewys waartoe hulle in staat is. Ons het baie goed voorberei, waardevolle ervaring opgedoen en is gereed vir die SDC Noordvaal.

Wat maak vanjaar se eerstespan anders as vorige spanne, en hoekom moet ondersteuners opgewonde wees om julle hierdie seisoen te sien speel? Hierdie jaar se Witbulle is doelgerig. Elke speler speel met trots vir die trui en betree die veld met die regte ingesteldheid. Die Witbulle van 2026 wil en gaan weer die trots in Monument-rugby terugbring.

Wat gaan deur jou kop in die oomblikke voordat jy die veld in jou skoolkleure betree? Ek dink aan die doel wat ons as span saam het. Ek probeer alle emosie uit die situasie haal en die veld betree met ’n doelgerigte ingesteldheid om my rol as agtsteman en kaptein te vervul. Ek dink aan al die Witbulle wat voor my in my posisie gespeel het, en hoe ek die trui op ’n beter plek kan laat.

Elke sterk span het sy eie identiteit — hoe sal jy julle span se speelstyl, ingesteldheid en gees beskryf? Die Witbulle is ’n sterk span met broederskap onder mekaar. Ons het ’n magiese speelstyl wat wissel van fisieke kragspel onder die voorspelers tot presiese spoedaanvalle deur die agterspelers. Die Witbulle het ’n magtige ingesteldheid en vrees geen span wat voor hulle staan nie.

Watter standaard het jy en jou span vir julself hierdie seisoen gestel, buiten net om wedstryde te wen? Ons het besluit dat ons alles vir God sal gee, omdat Hy ons gered het en ons so bevoorreg gemaak het om in die Witbultrui te speel. Ons het baie hoë standaarde gestel, want ons wil nie met middelmatigheid tevrede wees nie. Ons wil die trots van al die spelers wat voor ons gespeel het, behou.

Watter wedstryd staan vir jou die meeste uit op die kalender, en wat maak daardie wedstryd so belangrik vir die span? Die wedstryd teen Garsfontein staan vir my uit. Dit gaan een van ons grootste uitdagings in die SDC-beker wees. Hulle is ’n talentvolle, hardwerkende span en gaan kom met alles wat hulle het.

Wie in hierdie span dink jy gaan mense hierdie seisoen verras, en wat maak daardie speler iemand om dop te hou Roché Botha. Hy begin nou meer gemaklik raak met eerstespan-rugby en raak al hoe meer selfversekerd in sy eie spel.

Wat leer hierdie sport by jou skool vir spelers wat verder gaan as net wat op die veld gebeur? Dit leer spelers om aan te hou en aan te pas wanneer dinge nie jou kant toe gaan nie. Dit help jou om dissipline op te bou en selfdissipline toe te pas. Dit verbeter spelers se ingesteldheid rondom uitdagings en help hulle om meer selfvertroue op te bou.

 As kaptein, watter tipe leier wil jy hierdie seisoen vir jou span wees, en watter voorbeeld wil jy stel? Ek wil ’n leier wees na wie elke speler in die span kan kom met hul probleme en bekommernisse. Ek wil hulle help om altyd hul koppe omhoog te hou en vir niemand terug te staan nie. Ek wil deur voorbeeld lei en altyd myself op die lyn sit vir my spanmaats.

Wanneer mense julle span hierdie jaar sien speel, wat hoop jy sal hulle ná die tyd oor die groep sê? Dat ons nooit ophou nie, en dat hulle kan sien ons speel vir mekaar.