Dink of Sink 2025 dit is hier waar debatvoerders se impromptu dink- en redeneervermoë tot die uiterste beproef word. Toeskouers het op die punte van hul stoele gesit in die hoop dat hul gunstelingspan vinnig genoeg sou dink om nie te sink nie. Merensky Landbou Akademie het op Vrydag, 5 September, hul kultuurskoene aangetrek en kragte gemeet teen die Limpopo-skole.

Junior- en seniordebatspanne van Hoërskole Ben Vorster, Louis Trichardt, Pietersburg, Frikkie Meyer en Merensky Landbou Akademie het sake in die Limpopo-streeksuitdunne uitgespook. Plasieland se juniorspan (Ilana Lubbe, Miané van Veelen en Milan Ferreira) is as wenners gekroon, terwyl een van Ben Vorster se juniorspanne as naaswenners uit die praatstryd getree het

By die seniors was dit Eddie Mostert, Jean de Wet en Luzaan Erasmus wat met die wenbeker weggestap het, nadat hulle teen Frikkie Meyer te staan gekom het. Die seniors moes debatteer oor: “Tegnologiese betaaltoepassings moet kontant- en kaartbetalings vervang”, terwyl die juniors moes koppe bymekaar sit oor: “Moedertaalonderrig behoort ’n prioriteit in skole te wees.”

Die formaat van hierdie gewilde kompetisie, wat deur AfriForum aangebied word, bepaal dat spanne ’n aktuele onderwerp ontvang waaroor hulle vurig moet debatteer. Met slegs vyf minute voorbereidingstyd en ’n sewe minute kruisverhoor na afloop van elke spreker se beurt, word vasgestel wie het gedink en wie gesink. Merensky Kultuur bedank al die welsprekende deelnemers en hul ouers, asook die afrigters, organiseerders en beoordelaars wat hierdie kompetisie moontlik gemaak het. Natuurlik verdien AfriForum se toegewyde span ook applous vir hul weldeurdagte aanbieding van hierdie gewilde geleentheid.

Plasieland sal Limpopo verteenwoordig by die Nasionale Finaal wat op 27 September 2025 in Centurion plaasvind, waar die land se skole meeding om te bepaal wie die nasionale debatbeker huis toe neem.