Die Hoërskool Volksrust graad 11 Landbouwetenskappe leerders het na skool na Koringplaas vertrek. Hulle het ʼn informele lesing gehad oor voerkraalskape waar me. Ansie Podges bietjie vertel het oor lammers wat op hok gevoer word en afgerond word vir bemarking. Die leerders het ook die geleentheid gehad om self skaapmis in die voerhokke los te kap en sakke vol te maak. Die mis word by die skool gebruik vir ons komposprojek. Vroeër is grassnysels, blare en ander plantmateriaal weggery. Deel van die Landbouwetenskappe leer

plan gaan oor volhoubaarheid. Die aanwending van die gras en ander plantmateriaal is deel van hierdie poging tot volhoubaarheid om selfonderhoudend te wees ten opsigte van die skool se tuine en minder staat te maak op kunsmatige voedingstowwe.

Die graad 11 leerders se eerste “prakties” was die oopsny en snoei van die bome wat die afgelope ongeveer vyf jaar tydens boomplantdag aangeplant is. ʼn Ander projek wat in die beplanningsfase is in samewerking met mnr. Tiaan Koekemoer se Landboutegniese leerders, is die hoenderboerdery. Daar word gepoog om met ʼn klompie lêhenne te begin in die ou kweekhuis wat nie meer benut word nie. Volhoubaarheid word in die vooruitsig gestel deur die afvalkos uit die koshuise te benut en sodoende voerkostes laag te hou. Die eiers sal dan aan die koshuise beskikbaar gestel word. Beide leerders en personeel is baie opgewonde oor die projekte wat aangepak word.

~mnr. Jako Stevens~