Dit is vir die Beheerliggaam ‘n besondere voorreg om aan te kondig dat mnr. Phil-Henri Barnard as die nuwe skoolhoof Ooskus Gimnasium met ingang 1 Julie 2024 aangestel is. Ons sien uit daarna om vir mnr. Barnard in ons Ooskus Gimnasium-familie te verwelkom. Sy verbintenis met ons skool kom ‘n lang pad – eers as oudskolier vanaf 2000 tot 2004 waar hy die onderhoofseun in 2004 was. As leerder het hy in baie sport en kultuuraktiwiteite uitgeblink.

Na sy B.ED-graad aan die Universiteit van die Vrystaat in 2008, waar hy verskeie toekennings o.a. die Afrikaans-Neerlandistiek-beurs vanuit Nederland herhaaldelik ontvang het asook die toekenning as lid van die Golden Key International Honour Society, het hy hom by sy Alma Mater in 2009 tot 2019 as leerkrag aangesluit. Hy het Wiskunde en Wiskundige Geletterdheid, Geskiedenis, Geografie asook Afrikaans Huistaal onderrig. As rugby- en krieketafrigter het hy hom baie goed van sy taak gekwyt. Mnr. Barnard was graadhoof, betrokke by Die Lourier, Dinamika, leerlingraad, werwing en het o.a. die rasieleiers ingestel.

Tydens sy termyn by die skool het hy die B.A. Honneursgraad in Afrikaanse Letterkunde o.l.v. prof. Susan Smith aan die Universiteit van Fort Hare met lof geslaag. Mnr. Barnard verhuis nou vanaf Somerset-Oos waar hy die pos as Departementshoof Afrikaans aan die Gill Kollege beklee het en waardevolle ervaring as lid van die Bestuurspan opgedoen het. Mnr. A. Peenz, verteenwoordiger van die Departement van Onderwys, mnr. M. van Niekerk, voorsitter van die beheerliggaam en mev. L Knickelbein, uitgetredene skoolhoof, het vandag vir mnr. Barnard in sy nuwe kantoor as leier verwelkom.

Mnr. Barnard het ‘n opvallende passie vir die opkomende jeug en glo dat elke leerder tot sy/haar reg moet kom. Hy is ambisieus, op hoogte van onderwyssake en het ‘n breë visie vir diversiteit en verandering. Sy groot dryfkrag in die lewe is om as mens te groei asook om ‘n verskil in mense se lewens te maak.