Op die 11de April het Landsdiens leerders die koue, nat weersomstandighede getrotseer. Hierdie was beslis ‘n dag vir baie pret. Die Landsdiens middag se aktiwiteit was om die leerders se vermoë te toets om in ‘n span te werk. Leerders is in 8 spanne van 7 tot 8 leerders per span opgedeel. Hierdie aktiwiteit het plaasgevind in die omgewing waarin hulle elke dag leef en wat hulle soos die palm van hul hand ken. Leerders het aan ‘n skattejag deelgeneem of soos hulle in Engels sou sê ‘n “amazing race” in en om die skool. Hierdie het die leerders uitgedaag om vinnig en flink te dink. Aan die einde het die room-kleurige span koning gekraai. Hierdie span het 18 kaartjies in 14 minute gekry. Die is regoor die skool terrein versteek. Die leerders was uitgeput, maar het die aktiwiteit baie geniet.

Tydens Landsdiens op Maandag, 11 April het die graad 4’s en 5’s aan hul eie skattejag in die skool se gange en in van die klaskamers deelgeneem. Die leerders moes ‘n papierhaas soek, as hul eerste leidraad, om aan te dui dat hulle naby ‘n paaseier was. Toe ‘n paaseier gevind is, moes die leerders die papierhaas en die paaseier vat en terughardloop saal toe. In die saal moes die leerder ‘n kaartjie met die papierhaas skep en ‘n boodskap byvoeg om die persoon wat dit sou ontvang ‘n gelukkige Paasfees toe te wens. Hierdie aktiwiteit om iets te gee wat hulle geskep het, was gebaseer op een van die pilare van Landsdiens: liefde vir ons medemense. Die leerders het hierdie middag vreeslik geniet.