Awsum het gesels met die o.19A netbal-afrigters van Hoërskool Duineveld afrigter Madré Steyn, en Hoërskool Upington Christine Esterhuizen afrigter.

Madré Steyn, o.19A Netbal (Chillies) 1ste Netbalspan- afrigter van Hoërskool Duineveld gesels.

Wat kan die skool en ouers hierdie Interskole van julle span verwag? Interjol gaan hierdie jaar by die netbal ‘n baie kompeterende wedstryd wees. Albei spanne is goed voorbereid. Ek voorspel ‘n naelbyt, spanningsvolle wedstryd van goeie netbal.  

 Hoe berei julle span in die week tot aanloop van Interskole voor? (physically and mentally) In die laaste week voor Interjol verfyn ons ons wedstrydplan en maak seker dat elke speelster presies weet wat haar taak is en hoe sy dit moet uitvoer. Fisies is ons fiks, gespaar van enige beserings en reg vir ‘n baie harde wedstryd. Emosioneel herinner ons mekaar wat ons doelwit is, waar ons krag vandaan kom en ondersteun ons mekaar 100%.  

 Wie het die grootste invloed op jou as afrigter in jou lewe al gehad? Is daar iemand na wie jy opkyk? Netbal is al so lank deel van my lewe, ek kan myself nie indink daar sonder nie. Die grootste bydrae is seker my netbalafrigter in die laerskool wat die saadjie geplant het. Dan is daar ook netballegendes soos tannie Willa Louw, Alida Terblanche en Tokkie Oosthuizen wat die liefde van netbal en afrigting by my gekweek het.  

 Watter boodskap dra jy aan jou span oor net voor hulle op die baan/veld hardloop?  Dat jy ALTYD alles moet gee, maak nie saak wat die telbord sê nie!  

Christine Esterhuizen – 1ste Netbalspan- afrigter van Hoërskool Upington gesels.

Wat kan die skool en ouers hierdie Interskole van julle span verwag?
Die skool en ouers kan ’n sterk, goed voorbereide netbalspan verwag wat met spanwerk, deursettingsvermoë en trots sal speel. Ons mik daarna om elke wedstryd met toewyding aan te pak en ons skool se naam hoog te hou tydens hierdie Interskole.

Hoe berei julle span in die week tot aanloop van Interskole voor? (Fisiek en geestelik)
Ons span berei geestelik voor deur motiverende gesprekke, en ons fokus op positiwiteit en selfvertroue. Fisiek oefen ons daagliks met intensiewe fiksheids- en vaardigheidssessies om seker te maak dat ons fiks, skerp en wedstrydgereed is.

Waar sou jy sê lê julle krag hierdie jaar?
Ons span se krag lê hierdie jaar in ons eenheid, spanwerk, goeie kommunikasie, vertroue in mekaar en ons geloof in ons Hemelse Vader wat ons lei en versterk.

Wie het die grootste invloed op jou as afrigter gehad? Is daar iemand na wie jy opkyk?
Verskeie ander afrigters het al ’n groot invloed op my gehad — deur hul wysheid, benadering tot spelontwikkeling en hul passie vir spelers se groei. Dit het my geïnspireer om voortdurend te leer en my eie afrigtingsstyl te vorm.

Watter boodskap dra jy aan jou span oor net voor hulle die baan betree?
Vandag stap ons op die baan met meer as net ’n wedstryd voor ons – ons dra herinneringe, opofferinge en harte wat klop vir mekaar. Hierdie Interskole is besonders: vir vyf matrieks is dit hul laaste keer in die oranje rok, en ons dra ook die pyn van afskeid van ’n geliefde afrigter wat diep spore in ons almal se lewens gelaat het. Speel vir mekaar. Speel vir daardie stem wat julle van die kantlyn af aangemoedig het. Speel vir die trane, die lag, die harde werk – en vir die trots wat nie net in julle harte lê nie, maar ook in die hemel glimlag. Mag julle elke tree op die baan met moed en liefde neem. Vertrou op mekaar, wees trots op hoe ver julle gekom het, en onthou: God is saam met ons – nou, altyd, en selfs in trane. Ek glo in julle. Ek is trots op julle. Gee alles. Geniet dit.