Hoërskool Volksrust verwelkom met groot opgewondenheid die terugkeer van ‘n welbekende gesig na hul skoolgang, Mnr. Walter Egel. Die ervare onderwyser en rekenaarspesialis het reeds in Oktober 2023 by die skool aangesluit en bring ‘n skat van kennis met hom saam.
Walter Egel, ‘n oud-leerling van VHS Sasolburg, het sy studies voortgesit aan Sasolburg Kollege en werksomgewing opleiding ontvang. Hy het uitgeblink in vakke soos Inligtingstegnologie, verskeie programmeer tale, en Besigheidsstudies. Na ‘n suksesvolle tyd by Hoërskool Volksrust het hy ‘n paar jaar in die privaatsektor gewerk, waar hy sy vaardighede verder aangeskerp het as ‘n stelseladministrateur en besigheidsman.
Die nuwe onderwyser is bekend in die Volksrust-gemeenskap vir sy ongelooflike rekenaarkennis en is ‘n pionier in die veld van inligtingstegnologie. Sy passie lê in die opvoeding van die nuwe generasie en die voorbereiding van hulle vir die digitale wêreld waarin ons leef.

“Wat my motiveer, is om die nuwe generasie voor te berei op die uitdagings van die werklike wêreld van inligtingstegnologie,” sê Egel. “Ek wil hulle ‘n voorsprong gee en hulle geleenthede bied om suksesvol te wees in hierdie snel veranderende omgewing.”
As ‘n aanvulling tot sy onderrig, oorweeg Egel om ‘n nuwe buitemuurse aktiwiteit aan te bied. Alhoewel hy in die verlede betrokke was by hokkie, speel hy met die idee om ook e-sport in die skool in te voer, waardeur leerders hul digitale vaardighede verder kan ontwikkel.
Die gemeenskap van Hoërskool Volksrust is opgewonde oor die terugkeer van Mnr. Walter Egel en sien uit daarna om die nuwe rigting wat hy die skool in neem, te ervaar. Sy bydrae tot die onderwys en sy passie vir inligtingstegnologie beloof ‘n helder toekoms vir die leerders van Hoërskool Volksrust. deur Marietjie Steyn