Gewapen met konsentrasie, uithouvermoë en self-dissipline het Hoërskool Aliwal-Noord se vier skuts aan Prysskiet 2 deelgeneem. Hierdie mededingende Luggeweerkompetisie is by Hoërskool Fichardtpark in Bloemfontein aangebied. Die skuts het die dag baie geniet en “skutterend” gevaar. Izelle van Vuuren het ‘n goue medalje na die Buffelkamp toe gebring en behaal ‘n 1ste plek uit 69 skuts in die onder 16 afdeling met ‘n merkwaardige 868 punte. Johane Malan het ook die buffelnaam hoog gehou en behaal ‘n 22ste posisie uit 69 skuts met 761 punte.

Die twee beginner skuts in die span verbeter skoot vir skoot en het nie terug gehou by hierdie kompetisie nie. Nellie Geldenhuys behaal ‘n skitterende 12de posisie met 687 punte. Annika de Wet behaal ‘n trotse 48ste posisie met 534 punte. ‘n Totaal van 68 skuts het in die onder 14 afdeling deelgeneem. Hierdie vier dames het voluit gegaan om die buffelharte te laat klop.