Ons gesels met die netbal eerstespankaptein van Hoërskool Diamantveld- Johandri de Wet. Lees die spesiale uitgawe vir die Classic Clash tussen Diamantveld vs Noord-Kaap hier. Dis propvol spanfotos, onderhoude en al die aksie.

Johandri de Wet

Hoe was die voorseisoen vir hierdie span, en wat het dit vir julle gewys oor die groep se karakter, ingesteldheid en toewyding?  Die voorseisoen het ons as ’n span baie gehelp om mekaar beter as mense te leer ken, asook om te leer hoe om as ’n span saam te speel en mekaar deur die jaar te motiveer. Ons het almal hard saamgewerk en vertroue in mekaar gekry.

Wat maak vanjaar se eerstespan anders as vorige spanne, en hoekom moet ondersteuners opgewonde wees om julle hierdie seisoen te sien speel? Ek dink ons is hierdie jaar nie net ’n baie lekker span nie, maar ook ’n lekker groep kinders met baie gees en passie vir die jaar. Ons is ’n jong span en ek dink dit sal lekker wees om te sien hoe elkeen deur die jaar groei en ontwikkel.

Wat gaan deur jou kop in die oomblikke voordat jy die baan of veld in jou skoolkleure betree, en wat beteken daardie geleentheid vir jou persoonlik? Ek besef elke dag dat dit ’n baie groot voorreg is om kaptein te wees en om die span met passie en trots te lei en ’n goeie voorbeeld vir ander rondom my te stel, ten alle tye. Wanneer ek my skoolkleure dra, beteken dit vir my meer as net netbal; dit is om iets groter as myself te verteenwoordig.

Elke sterk span het sy eie identiteit — hoe sal jy julle span se speelstyl, ingesteldheid en gees beskryf?  Ons is ’n groep met baie goeie gees, en dit help ons om mekaar positief te hou sodat ons tot die einde ons beste kan gee. Omdat die span nog jonk is, het elkeen ’n goeie ingesteldheid om in hul posisies te groei.

Watter standaard het jy en jou span vir julself hierdie seisoen gestel, buiten net om wedstryde te wen? Ek dink dit is vir ons belangrik om die sport te geniet, al gaan dit nie altyd so goed nie. Omdat ons nog ’n jong span is, wil ons graag ’n goeie gees en passie vir die jonger spanne ook skep.

Skoolnuus in jou area word met trots geborg deur Cherry Kimberley

Watter wedstryd staan vir jou die meeste uit op die kalender, en wat maak daardie wedstryd so belangrik vir die span? Ek sal sê Affies is ’n baie lekker wedstryd om na uit te sien, want dit is gewoonlik die eerste wedstryd van die seisoen en die atmosfeer is elektries. Dit is ook ’n lekker manier om jouself teen een van die beste skole te toets.

Wie in hierdie span dink jy gaan mense hierdie seisoen verras, en wat maak daardie speler iemand om dop te hou? Ek sal sê Liané. Sy is nog baie jonk, het ’n groot passie vir die sport en is bereid om haar alles te gee en meer te leer.

Wat leer hierdie sport by jou skool vir spelers wat verder gaan as net wat op die baan of veld gebeur? Dit is baie belangrik om jou spanmaats ten volle te vertrou en bereid te wees om alles vir jou span te gee. Dit leer jou om nie sommer moed op te gee wanneer dinge moeilik raak nie, maar tot die einde aan te hou. Jy moenie net op jou eie insigte staatmaak nie, maar ook ander toelaat om jou te ondersteun.

As kaptein, watter tipe leier wil jy hierdie seisoen vir jou span wees, en watter voorbeeld wil jy stel?  Ek wil graag iemand wees wat ’n goeie voorbeeld vir my span stel deur hard te werk, respek te wys en ook altyd positief te bly om die atmosfeer goed te hou. Ek wil hê my spanmaats moet weet dat hulle altyd op my kan staatmaak, op en van die baan af. Vir my gaan leierskap nie net oor wen nie, maar ook oor hoe ons mekaar opbou om saam te groei.

Wanneer mense julle span hierdie jaar sien speel, wat hoop jy sal hulle ná die tyd oor die groep sê? Dit sal vir my lekker wees as mense sien dat ons die sport ten volle geniet en bereid is om ons alles te gee.