Lees die spesiale uitgawe vir die Classic Clash tussen Goudveld-Hoërskool en Welkom Gimnasium hier. Dis propvol spanfotos, onderhoude en al die aksie.

AWSUM het die geleentheid gehad om met Hayley Wedderspoon, Eerstespan Netbalkaptein van Welkom Gimnasium te praat oor hul voorbereiding, sterkpunte en vooruitsigte vir die seisoen..

Hayley Wedderspoon

Watter netbalster of sportpersoonlikheid bewonder jy en hoekom juis hy of sy? Sanmarie Visser. Sy studeer by NWU en was daar toe ons in 2024 in Potchefstroom was vir ’n netbaltoer. Sy speel nou vir die Proteas en inspireer jong netbalspelers elke dag om hul drome na te jaag. Sy het my geleer om nooit op te gee op wat ek wil bereik nie.

Wat dink jy maak julle span hierdie jaar mededingend? Ons het ’n relatief jong span waarvan die meeste spelers verlede jaar nog o.16 gespeel het. Ons het verlede jaar die Lejweleputswa-liga gewen, en die meeste van daardie spelers is nou in die eerstespan. Ons ken mekaar goed, bou voort op verlede jaar se suksesse, en skaaf steeds om nóg beter te presteer.

Wat beteken dit vir jou om jou skool as ’n eerstespan-speler te verteenwoordig? Ek en my sussie verskil ses jaar, so ek het sedert graad 4 elke jaar die eerstespan-wedstryde bygewoon en altyd gedroom om ook eendag my kans te kry om Gimmies as ’n eerstespan-speler te verteenwoordig.

Watter span of toernooi beskou jy as julle grootste uitdaging hierdie seisoen?Oranje Meisieskool, want hulle het al verskeie Vrystaatbekers gewen. En natuurlik bly die jaarlikse Derby teen Goudveld ’n rooiletterdag op ons netbalkalender.

Hoe het die span hulle vir die seisoen voorberei en op watter aspekte van die spel het julle gefokus? Ons het gekonsentreer op balvaardighede, behendigheid, aanval, verdediging en veral op spanbou en spangees.

Lees wat hul afrigters Simone Cloete, Chante Walker en Marlene Groenewald te sê het:

Wat kan die skool en ouers hierdie Interskole van julle span verwag? Soos elke jaar, beloof hierdie jaar se Derby om ’n vertoning te wees van uitmuntende talent en goeie sportmangees. Ons streef voortdurend daarna om aanskoulike en kompeterende netbal te speel.

Waar sou jy sê lê julle krag hierdie jaar? Beslis in die veelsydigheid van ons spelers. Elkeen kan verskeie posisies speel en pas maklik aan by veranderinge tydens die wedstryd. Hulle aanpasbaarheid tot verskillende spelstyle is ’n groot bate. Ons belangrikste bron van krag lê egter in ons Hemelse Vader. Ons geloof in Hom, en in mekaar as mede
sussies op die baan, maak ons span besonders sterk en bekwaam.

Hoe berei julle span in die week tot aanloop van Interskole voor? (Fisies en geestelik) Roetine is vir ons belangrik, daarom wyk ons nie te veel daarvan af nie. Ná elke wedstryd doen ons ’n deeglike analise van die statistieke en fokus ons op foutontleding om enige probleemareas te identifiseer en daaraan te werk. Derbyweek is altyd baie besig, maar ons fokus bly deurentyd op die wedstryd. Tydens die week berei ons ook emosioneel voor op die strawwe kompetisie wat voorlê – ons lig die moraal, neem deel aan verskeie aktiwiteite, en werk voortdurend aan ons spangees.

Wie het die grootste invloed op jou as afrigter gehad? Is daar iemand na wie jy opkyk? Ek is bevoorreg om al by baie ervare en inspirerende afrigters te kon leer – onder andere Lesley Hale en Lizelle Janse van Rensburg. Elkeen van hulle het my iets uniek geleer oor die spel. Hulle het my onder hul vlerk geneem en my alles geleer wat ek vandag
weet. Dit was ’n eer om van sulke mentors te leer, en ek sal altyd dankbaar wees vir die invloed wat hulle op my afrigtersreis gehad het.

Watter boodskap dra jy aan jou span oor net voor hulle op die baan gaan? Ek vra hulle om daardie klein dogtertjie in hulle te onthou – die een wat op sewe of agt jaar oud net opgewonde was om netbal te kon speel. Die enigste ding wat ek van hulle verwag, is om hul beste te gee en die spel sáám met hul spanmaats te geniet. Die liefde vir God, en vir die talente wat Hy vir hulle gegee het, is een van die belangrikste aspekte van spansport – iets wat dikwels oor die hoof gesien word.