Die Liggies se 1ste en o.15 seunskrieketspanne het die afgelope naweek teen Hoërskool Brandwag van Benoni gespeel. Ligbron het albei die wedstryde oortuigend gewen.

Ligbron Akademie vir Tegnologie se O.15 krieketspan

In die 1ste span se wedstryd het Ligbron die loot gewen en besluit om eerste te boul. Met ster boulers soos Lohan Swart en Johardt Swanepoel word Brandwag in die 34ste boulbeurt vir net 103 lopies uitgeboul. Swart neem in 4.3 boulbeurte 3 paaltjies vir slegs 5 lopies. Swanepoel is kort op sy hakke met 3 paaltjies vir slegs 32 lopies in 10 boulbeurte.

Die Liggies was ook met die kolfwerk Brandwag se meerdere. Hulle steek Brandwag se telling reeds in die 18de boulbeurt verby. Ook hier het Swart sy staal gewys met 23 lopies van 47 balle, nie uit nie. Dit is egter RJ Kinnear wat die koning agter die kolf is met sy 49 lopies van 46 balle, nie uit nie. Ligbron wen die westryd met 9 paaltjies.

Die o.15’s volg die 1stes se voorbeeld en wen hul wedstryd ook met 9 paaltjies. Hulle wen soos die 1stes ook die loot en besluit ook om eerste te boul.

Met die uitstekende boulwerk van Jahred Harper, wat 2 paaltjies neem in 7 beurte en slegs 11 lopies afstaan, asook Zander Swart wat 3 paaltjies neem in 7.2 beurte vir slegs 21 lopies, word Brandwag in die 28ste beurt vir 96 lopies uitgeboul.

Toe die Liggies agter die kolf inskuif maak hulle korte mette met Brandwag deur hul telling reeds in die 9de beurt verby te vat. Michael Ronquest se ongelooflike kolfwerk was een te veel vir die Brandwag boulers. Ronquest slaan 41 lopies van slegs 21 balle, nie uit nie.

Ligbron Akademiese se eerste krieketspan