MALMESBURY – Die Chritstelike Privaatskool Malmesbury (CPM) was Saterdag ‘n massiewe vertoonvenster van jeugsport tydens hul 23ste Wintersportdag. Die kombinasie van strawwe kompetisie op die veld en ‘n opwindende kermisatmosfeer langs die kantlyn het gewys waarom dié dag ‘n hoogtepunt op die plaaslike sportkalender bly.
Die byeenkoms is amptelik geopen deur mnr. Waldo Cloete, hoof van CPM, wat die belangrikheid van geleenthede waar kinders hul passie vir sport in ’n gesonde omgewing kan uitleef, beklemtoon het.

Passie vir Netbal

Vanjaar se Sportdag het 12 skole van regoor die provinsie gelok, insluitend spanne van Vredendal, Riebeek-Kasteel, Paarl, Citrusdal en Langebaan. Met altesaam 51 rugbyspanne en 67 netbalspanne op die veld was daar bykans 1 200 leerders wat hul staal gewys het. Onder die uitblinkers was CPM se eie o/9- en o/10-netbalspanne en o/9A rugbyspan, wat onoorwonne uit die stryd getree en hul plaaslike ondersteuners genoeg rede gegee het om fees
te vier.

CPM Onder 9 Netbal Span

Mnr. Cloete het sy opgewondenheid oor die dag se verloop gedeel en gesê dat die waarde van die byeenkoms veel verder as die telbord strek. “Om te sien hoe kinders van regoor ons streek met soveel oorgawe speel en vriendskappe smee, herinner ons aan die ware krag van sport. Hierdie dag gaan oor meer as punte; dit gaan oor die skep van herinneringe en die bou van karakter in ’n ondersteunende gemeenskap. Ons is ongelooflik bevoorreg om soveel talent en samesyn op ons velde te kan verwelkom,” het hy gesê.

Die kermisatmosfeer langs die kantlyn is versterk deur ’n verskeidenheid kosstalletjies wat die Swartland se beste eetgoed aangebied het. Die VLV Malmesbury se bekende pannekoeke was oudergewoonte ’n groot trekpleister, terwyl die gewilde “chip twisters”, vars Roman’s pizzas, boereworsrolle, heerlike koffie en roomys gesorg het dat niemand honger huis toe is nie.

CPM Onder 10 Netbal Span

Sportdag van hierdie omvang en gehalte word slegs moontlik gemaak deur die getroue ondersteuning van die plaaslike sakegemeenskap. Die skool het hul opregte dank uitgespreek teenoor borge soos AFGRI, Agrimark, Citrusdal Kelders, FODB, Food Lover’s Market, InteliGro, Myride Malmesbury, Nebula Asset Protection, Nova Voere, Overberg, Rugga Roots, Shift Netball Academy, Swartland Finansiële Dienste en Tyremart.

In aksie vir CPM

Met die afsluiting van die 23ste Wintersportdag het CPM opnuut hul vernuf gewys om grootskaalse logistieke reëlings met egte Swartlandse gasvryheid te kombineer. Uiteindelik was dit egter die onberispelike sportmanskap en die gees van samesyn wat bewys het dat CPM nie net kampioene op die veld slyp nie, maar ook ’n platform bied waar vriendskap en karakter die finale tellings op die bord oortref.

Rugby

Entoesiasme was in die lug

Fantastiese spanwerk op die Rugbyveld

Pale toe

Passie is alles