Victor Matfield praat interskole. AWSUM het gaan inloer by Hoërskool Pietersburg oud-leerder en oud-Springbok Victor Matfield om te hoor wat hy oor Bosveld Intervarsity onthou en sy skooljare.

Ons moet begin deur te vra oor jou skoolloopbaan. Wat sal onderwysers van jou vertel? Ek dink wat hulle sal onthou, is seker maar `n stillerige outjie wat maar meestal op sport gefokus het en wat heel goed in sy akademie gedoen het. Ek was nie `n groot partytjiemens nie.

Wat sal jy altyd van die Bosveld Intervarsity onthou? Bosveld Intervarsity was altyd baie spesiaal. Die week vooraf is jou sketse in die saal op en is jy aan die hele skool voorgestel. Dit is net `n ongelooflike gevoel.

Watter tipe ou was jy op skool? Ek is gebore in Pretoria. My pa was skoolhoof by Noord Skool, so ek was al die jare daar tot ek varsity toe is. Ek was nog altyd baie lief vir sport. Ek het groot geword met krieketnette, tennisbane en enige iets wat met `n bal te doen het. Al my geskenke was altyd sportgoed, so ek het `n groot liefde vir sport. Dit was nooit vir my `n werk nie. Ek het geglo as ek harder werk as enige iemand anders sal ek suksesvol wees.

As jy nie `n rugbyspeler was nie, watter sport sou jy wou beoefen? Vir seker krieket, want ek was op skool seker `n beter krieketspeler en is baie lief vir krieket.

Wie gaan Saterdag wen? Vir seker PHS. Ek kan mos nou nie teen my skool gaan nie. My ma het by Tom Naude skoolgehou so op laerskool wou ek altyd in die bruintrui speel, maar dit het baie vinnig verander toe ek PHS toe is.

Ons weet jy was die wêreld se beste slot op jou dae. As jy nie in jou posisie gespeel het nie, in watter ander posisie sou jy graag op die rugbyveld wou speel? Kyk, as `n jong mannetjie het ek altyd gedroom om losskakel te wees, maar op laerskool het ek agsteman gespeel, maar nog steeds pale en kantlyn toe geskop. Ek kon links en regs ewe goed skop op skool, so dis dalk hoekom ek, toe ek Bok gespeel het, te veel in die agterlyn was. Ek het altyd gedroom om daai losskakel te wees, maar die naaste wat ek gekom het was agsteman. So ja, as ek nie slot gespeel het nie, sou ek graag agsteman wou speel. Ek het darem toe ek in Toulon was agsteman gespeel.

Jy was die Springbokkaptein – wat was die waardevolste les wat jy in daardie posisie geleer het? As kaptein dink ek die belangrikste les wat ek geleer het, is jy kan nie alles self doen nie. Jy kort sterk manne om jou te ondersteun en jy moet hulle vertrou. Jy moet hulle bemagtig en dan moet jy hulle vertrou. `n Kaptein is nooit alleen nie. Dis altyd `n kaptein en sy korps wat almal saam werk om sukses te bereik. So, ek dink die grootste les is dat jy nie alles self kan doen nie. Jy moet ouens saam jou kry wat al jou spelers ken, want as jy hulle ken, dan weet jy hoe ook om hulle te motiveer. Jy moet rerig tyd maak om by elke persoon te sit en hulle te leer ken om te weet hoe om die beste uit hulle te kry.

Blitsvrae: Kies een
• Braai of Takeaways? Definitief `n braai.
• `n Lekker double cab bakkie of `n vinnige sportmotor? Nie `n sportmotor nie. Ek is meer `n SUV man.
• Beste vakansiewegbreek? Die beste vakansieplek is Heroldsbaai waar ek altyd Desember gaan vakansie hou.