AWSUM het met Barend du Plessis, Hoërskool Duineveld se o.19A hokkiekaptein oor Groot Interjol gesels.

Wat is die hoogtepunt van julle span se seisoen sover?
Ons het vroeg in die seisoen ons eerste wedstryd teen Diamantveld 1-3 verloor. Die span het daarna baie hard gewerk en ons het ons tweede wedstryd teen hulle, (wat ook ons ligawedstryd was), 2-2 gelykop gespeel. Hierdie tweede wedstryd was my hoogtepunt van die seisoen, omdat dit gewys het watter vordering daar in ons span was.

Hoe motiveer jy jou span?
Wanneer dinge moeilik in ’n wedstryd gaan, probeer ek die heeltyd om my spanmaats moed in te praat, en ons werk saam om ons koppe op te tel.

Wie is julle onderkaptein en hoe staan hy jou by?
In ons hokkiespan het ons twee onderkapteine, Adrian Joubert en Jandré Kellerman. Hulle help my met my pligte en praat baie met die spelers op die veld en motiveer hulle die hele tyd.

Hoe is die samestelling van die span vir Groot Interjol?
Die spelers kom goed met mekaar oor die weg en daar heers ’n goeie spangees. Elke speler weet presies wat sy posisie op die veld behels en wat van hom verwag word, en almal ondersteun mekaar.

Wat wil jul as `n span die jaar bereik?
Ons wil al die harde werk wat ons as span ingesit het en die vordering wat ons gemaak het, sien in ons laaste wedstryd van die seisoen. Ons gaan ons harte uitspeel, en wen of verloor, wil ons die oomblik geniet. Dit sal my baie gelukkig en geweldig trots maak as ons ’n wen kan byvoeg vir ons laaste wedstryd.

Wat is jou planne vir die toekoms?
My plan vir die toekoms is om in ’n landbou-rigting werk te kry en die grootmens-lewe met albei hande aan te gryp. As hierdie plan goed uitwerk, wil ek by ’n klub aansluit en my hokkie verder neem.

Lees die Groot Interjol se spesiale AWSUM-uitgawe aanlyn hier.