AWSUM het met Philip-Albert van Niekerk, Paarl Gim se o.19A rugbykaptein gesels oor Interskole.

Wat is die hoogtepunt van jou rugbyloopbaan tot dusver en wat is die hoogtepunt van jou span se seisoen sover?
My hoogtepunt was toe ek laasjaar vir die SA o.18-groep gekies is wat na Georgië sou toer en weens Covid-19 was die toer gekanselleer. Ons span se hoogtepunt die jaar is vir seker ons wen teen Grey Kollege op Wildeklawer.

Hoe motiveer jy jou span?
Ek voel nie dit is nodig vir my om my span te motiveer nie. Sodra jy die Gim-trui bo oor jou kop trek, kom jy agter watter eer en verantwoordelikheid dit is om vir Paarl Gimnasium se eerstespan te speel.

Wie is julle onderkaptein en hoe staan hy jou by?
Ons onderkaptein is Luca Bakkes. Hy is ook my kleinneef, so dit is meer as net ‘n vriendskap. Ek is nie alleen die kaptein van die span nie. Ek en Luca help mekaar om ons span te help. Daar is baie leiers in ons span en dit help my verskriklik baie.

Hoe is die samestelling van die span vir Interskole? Is daar enige beserings?
Ons samestelling van die span is baie goed. Dit is alles in die hande van ons coaches in wie ons almal ongelooflik baie vertroue het en ons weet elke besluit word met ‘n goeie rede gemaak. Ons het die jaar ‘n paar beserings gehad wat ‘n uitdaging was, maar elke speler wat ingekom het, het sy kant gebring. Ons gaan die wedstryd aanpak sonder Logan Opperman wat begin van die jaar sy knie teen Stellenberg beseer het.

Is julle gelukkig met julle resultate as span die jaar?
Daar was twee wedstryde wat nie ons kant toe gegaan het die jaar nie, maar ons kan nie aanhou in die verlede vaskyk nie en moet besluit om uit ons foute te leer en aan te beweeg na die volgende uitdaging.

Wat verwag jy van Boys’ High Saterdag?
Ek verwag ‘n goed voorbereide en afgerigte span wat hulle alles gaan gee.

Wat is jou planne vir die toekoms?
Ek het ‘n ongelooflike groot passie vir rugby en dit is my droom om in die toekoms dit hopelik verder te kan neem.

Klik hier vir die o.19A rugbyspan van Gim.

Lees die digitale weergawe van die AWSUM Interskole koerant aanlyn hier.