AWSUM het met Carna Theron, Hoërskool Durbanville se o.19A netbalkaptein gesels oor Interskole.

Wat is die hoogtepunt van julle span se seisoen sover? Een van ons hoogtepunte was ‘n baie suksesvolle Gim – toernooi aan die begin van die jaar, waar ons teen spanne van regoor die land meegeding het en mekaar as span gevind het. Dit was ‘n baie goeie afskop vir die seisoen en was beslis ‘n hoogtepunt.

Hoe motiveer jy jou span? Ek probeer altyd motiveer deur ‘n voorbeeld te stel -‘n voorbeeld te stel van hoe “commitment” en harde werk lyk. Ek praat ook altyd my span moed in deur die spelers se aandag op die positiewe en op die goeie aspekte van ‘n wedstryd te vestig, in plaas daarvan om op die negatiewe te fokus en in die foute vas te kyk. Ek sal voor ‘n wedstryd en tussen kwarte die meisies motiveer om aan te hou veg en te speel tot die eindfluitjie blaas.

Wie is julle onderkaptein en hoe staan sy jou by? Ons onderkaptein is Danny Roux. Sy staan my
ongelooflik goed by en ons vul mekaar baie goed aan. Sy dink soos ek en sal altyd goeie perspektief na ‘n situasie bring. Dit help ook baie dat ek aan die Hoërskool Durbanville aanvallende kant speel en sy aan die verdedigende kant. So kan ons regdeur die wedstryd die hele baan “cover” en van albei kante af aanmoedig en leiding gee. Ons werk baie goed saam en ek is baie bevoorreg om haar aan my sy te hê.

Hoe is die samestelling van die span vir die Interskole? Enige beserings? Nege van ons tien spelers is gereed om 100% by Interskole te gee. Ons het huidiglik een besering wat ons bestuur en dophou met tyd. Verder is ons reg vir Interskole.

Wat wil jul as `n span die jaar bereik? Wat sal jou trots maak? Natuurlik wil ons graag Interskole wen. Ons hoofdoel vir die seisoen is egter om in die liga – finaal te speel en om as die ligawenners van 2022 gekroon te word. Dit sal my, ons span en ons afrigters verseker trots maak.

Wat is jou planne vir die toekoms? Ek gaan volgende jaar BCom Regte by die Universiteit van Stellenbosch studeer. Wat netbal betref, sal ek nog vir my koshuis speel, maar vir eers wil ek net op my studies fokus.

Klik hier vir die o.19A netbalspan van Hoërskool Durbanville.

Lees die digitale weergawe van die AWSUM Interskole koerant aanlyn hier.