Yvette Potgieter gesels: Ek het in 2004 vir die eerste keer my voete op Framesby se skoolgronde gesit, of sal ek sê my wiele parkeer aangesien ons as leerlingbestuurders by die skool moes opdaag met n kar wat uit ‘n kartonboks gemaak is, wiele om ons enkels en n groot rooi L op elkeen se rug geplak. Dit was die streng instruksies van die graad 12 leerders. Ek het in 2008 matrikuleer en sal tot vandag toe nooit ons eerste week by die skool vergeet nie. Daar is baie goeie herinneringe en hoogtepunte van my 5 jaar loopbaan by Framesby, maar om ‘n paar te noem sal beslis die bekende interhuisatletiekdae tussen die Kritte en Visse wees, die gees van interskole asook ons matriekjaar.

Ek het nie regtig uitgeblink in sport nie, maar het dit vreeslik geniet. My hele hoërskoolloopbaan het ek muurbal gespeel en gedans. Ek het vir twee jaar landloop gedoen en ek was ook betrokke by landsdiens in graad 8. Ek het direk na skool somatologie by Elizabeth’s Beauty School gaan studeer. Na ‘n paar jaar se ondervinding het ek in 2014 besluit om my vlerke te sprei en vir myself te begin werk. Dit was beslis een van die moeilikste asook een van die
beste besluite van my lewe. In 2016 het ek die geleentheid gehad om vir ‘n jaar deeltyds vir dr. Odendaal in sy praktyk in die akneekliniek te werk. Ek is ook aan die einde van 2016 genooi om vir ‘n kort rukkie te gaan uithelp in n salon op ’n privaatoord in die Seychelles wat n ongelooflike geleentheid was. Ek het tans my eie skoonheids salon “Flourish Skincare and Beauty Studio”. Verlede jaar het ek met ‘n wonderlike man getrou waarmee ek snaaks genoeg het op skool uitgegaan het. Ons paadjies het weer aan die einde van 2020 gekruis en die res was soos hulle sê geskiedenis. Ons het 2 hondekinders Tyson, ‘n 13 jarige Rottweiler en Onyx, ‘n 2 jarige French Bulldog. My advies aan huidige skoliere: Geniet elke oomblik van jonkwees, tyd staan vir niemand stil nie.