As daar een ding is wat Kalaharikinders kan doen, is dit hardloop. Lang asems, uithouvermoë en weergalose veggees, dít is waaroor Laerskool Kathu se landloopatlete beskik. Die landloopatlete het die seisoen op ’n hoë noot begin en vroeg al gewys dat hulle dopgehou moet word. Op Saterdag 24 Augustus het 6 van Laerskool Kathu se landloopatlete as deel van die JTG-span aan die Noord-Kaap Kampioenskappe in Upington gaan deelneem. Een van die deelnemers is nog maar in graad R in Bana-kleuterskool, maar neem deel saam met Laerskool Kathu se atlete.

Die atlete het hulself uitstekend van hul taak gekwyt en goeie tye behaal, almal is ongelukkig nog te jonk vir die Suid-Afrikaanse kampioenskappe. Johané Rademeyer het goud verwerf vir dogters o. 6 met ’n tyd van 5:24. Daar is geen amptelike rekord vir dogters o. 6 nie. Emma Visser het silwer verwerf vir dogters o. 7 met ’n tyd van 4:55. Sy verbeter steeds die Noord-Kaaprekord met 24 sekondes. Die wenner se tyd was 4:48.

Die ander atlete het ook baie goed presteer. Leah Adendorff het ’n vyfde plek behaal vir dogters o. 8. Lukas Visser het ’n vyfde plek behaal vir seuns o. 9 en Leané Rademeyer het ’n vyfde plek behaal vir dogters o. 8. Baie geluk aan al die landloopatlete. Ons hou julle dop en kan nie wag dat ons julle eendag na die Suid-Afrikaanse kampioenskappe kan stuur nie. Oefen solank vir volgende jaar en moenie ophou droom nie!

Zanelle de Wet, Leah Adendorff, Emma Visser, Johané Rademeyer, Lukas Visser en Leané Rademeyer het Laerskool Kathu se naam hoog gehou tydens die Noord-Kaap Kampioenskappe vir landloop op Saterdag 24 Augustus in Upington.