Boeke is soos klein geheime deurtjies wat jou wegvoer na nuwe plekke. Dit is soms ’n spieël waarin jy jouself en die wêreld kan sien. Boeke kan ook soos ’n vakansie wees, want dit neem jou na interessante plekke en belewenisse. Só vertel Fanie Viljoen vir sy verskeie jong aanhangers. Op Donderdag 10 Oktober het die graad 3- tot graad 6-klasse van Laerskool Kathu die voorreg gehad om aan jeugboekskrywer Fanie Viljoen se lippe gehang. Fanie is vergesel deur jeugboekskrywer Hannes Barnard die opvoedkundige verkoopsbestuurder van LAPA Uitgewers.

Fanie het vir die leerders meer van sy boeke en skryfwerk vertel. Hy het ook meer vertel van sy nuutste boeke getiteld Springboekie (In Engels ook beskikbaar as Springbuckaroo), Frikkadel (Meatball) en Jani Jonker gloei in die donker. Die kinders is behoorlik meegevoer deur Fanie se kwinkslae en hy het hulle selfs laat wip van die skrik met sy boeiende vertelstyl. Al die kinders wou nie noodwendig met Fanie saamstem dat die Cheetahs die beste rugbyspan in die land is nie, maar almal is soos een man verenig agter die Springbokke.

Ná Fanie se praatjie, moes hy soos ’n ware filmster ontelbare handtekeninge uitdeel en ’n nuwe leesvlam is by verskeie jong lesers aangesteek. Tydens ’n boekverkoping van LAPA Uitgewers op Maandag 14 Oktober en Dinsdag 15 Oktober was dit veral sy Ouma Mollie-boeke wat die jong lesers graag wou koop. Fanie het met sy humoristiese skryfwerk en sy besoek aan Kathu beslis nuwe aanhangers bygekry. ’n Ma vertel dat haar dogtertjie wat voorheen niks wou weet van lees nie, nie genoeg kan kry van Ouma Mollie se avonture nie.